ଯାଜପୁର: କେବଳ ବହିରେ ପଢିଲା ବେଳେ ଆମେ ଜାଣିଥିଲେ ସେଓ ସାଧାରଣତଃ ଥଣ୍ଡା ଜଳବାୟୁ ଅର୍ଥାତ କାଶ୍ମୀର ଭଳି ରାଜ୍ୟରେ ଫଳେ । ମାତ୍ର ଏହା ଭୁଲ ପ୍ରମାଣ କରି ଦେଖେଇଛନ୍ତି ଯାଜପୁର ଜିଲ୍ଲା କୋରେଇ ବ୍ଲକ ବନ୍ଦାଳୋ ପଞ୍ଚାୟତର ରବୀନ୍ଦ୍ର କୁମାର ନାୟକ । ରବୀନ୍ଦ୍ର ନିଜ ବଗିଚାରେ 60ଟି ସେଓ ଗଛ ଲଗେଇଛନ୍ତି । ଖାଲି ସେଓ ନୁହେଁ ରବୀନ୍ଦ୍ର ନିଜ ବଗିଚାରେ ପିଜୁଳି, ସପେଟା, ଆମ୍ବ, ଡାଳିମ୍ବ ଓ ପଣସ ଆଦି ଫଳ ଗଛ ଲଗାଇ ନିଜ ପରିବାରର ପ୍ରତିପୋଷଣ କରିବା ସହିତ ଅନେକ ଲୋକଙ୍କୁ ରୋଜଗାର ଦେଇ ପାରିଛନ୍ତି । ଏହି ବଗିଚାକୁ ଅଧିକ ସୁନ୍ଦର କରୁଛି ସେଓ ପେନ୍ଥା । ଯେତେବେଳେ ପବନ ବହୁଛି ଏହି ସେଓ ପନ୍ଥା ଝଲିସି କାଶ୍ମୀର ଭ୍ରମ ସୃଷ୍ଟି କରୁଛି ।
ଯାଜପୁର ଜିଲ୍ଲାର ରବୀନ୍ଦ୍ର ନାୟକ ଦିନେ ବାହାରେ ପରିବା ବେପାର କରି ନିଜ ପରିବାର ପ୍ରତିପୋଷଣ କରୁଥିଲେ । ମାତ୍ର ଯେତିକି ରୋଜଗାର କରୁଥିଲେ ନିଜ ପରିବାର ଚଳେଇବାକୁ କଷ୍ଟକର ହେଇ ପଡୁଥିଲା । ସେବେଠାରୁ ସେ କିଛି ନୂଆ କାର୍ଯ୍ୟ କରିବାକୁ ଚେଷ୍ଠା କରୁଥିଲେ । ସେଥିପାଇଁ ବିଭିନ୍ନ ଲୋକଙ୍କ ସହଯୋଗ ଓ ନିଜ ପ୍ରଚେଷ୍ଠାରେ ଆଜି ଯାଜପୁର ଭଳି ମାଟିରେ ସେଓ ଚାଷ କରି ସଫଳ ହେଇ ଅନେକଙ୍କ ପାଇଁ ଉଦାହରଣ ସାଜିଛନ୍ତି । ପ୍ରଥମେ ଏହି ସେଓ ଚାଷପାଇଁ ରବୀନ୍ଦ୍ର ହିମାଚଳ ପ୍ରଦେଶରୁ ଚାରା ମଗେଇଥିଲେ । ଏଥି ସହିତ ବିଭିନ୍ନ ସୋସିଆଲ ମିଡ଼ିଆରୁ ସେଓ ଚାଷ ସମ୍ପର୍କରେ ନିଜେ ଅଭିଜ୍ଞତା ନେଇ ବିଭିନ୍ନ କୀଟନାଶକ ଦ୍ରବ୍ୟ ଦେଇ ଚାରା ଲଗାଇବା ଆରମ୍ଭ କରିଥିଲେ । ରବୀନ୍ଦ୍ରଙ୍କୁ ଏହି ସେଓ ଚାଷ ପାଇଁ କୌଣସି ସରକାରୀ ସାହାଯ୍ୟ ମିଳି ନଥିଲା ।
ରବୀନ୍ଦ୍ର ଦିନ ରାତି ଏକ କରି ଏହି ସେଓ ଚାଷ ପ୍ରତି ମନ ଦେବାରୁ ଆଜି ସଫଳତା ପାଇଛନ୍ତି । କେବଳ ରବୀନ୍ଦ୍ର ନିଜ ବାଡ଼ିରେ ସେଓ ଗଛ ନୁହେଁ ବିଭିନ୍ନ ପ୍ରକାରର ଫଳ ଗଛ ଯଥା ଆମ୍ବ, ପିଜୁଳି, ସପେଟା, ଅମୃତଭଣ୍ଡା, ପଣସ ଓ କାଶ୍ମିରୀ ବେରି କୋଳି ପ୍ରଭୃତି ଚାଷ କରିବା ସହ ଏବେ ସେଓ ଚାଷ କରି ଅନେକ ଲୋକଙ୍କୁ ରୋଜଗାର ଦେଇଛନ୍ତି । ରବୀନ୍ଦ୍ର ପ୍ରଥମେ ପନିପରିବା ଚାଷ ସହ ଆମ୍ବ , ପିଜୁଳି ଚାଷ କରି ବାହାର ବଜାରକୁ ନେଇ ବିକି ନିଜ ପରିବାର ପ୍ରତିପୋଷଣ କରୁଥିଲେ । ପରେ ଏହି ଚାଷରେ ନିଜ ପରିବାର ପ୍ରତିପୋଷଣ କରିବା କଷ୍ଟ ହେବାରୁ ଓଡ଼ିଶା ବାହାରର ଏକ ସେଓ ବଗିଚାକୁ ଯାଇ ସେଠାରୁ ସେଓ ଚାଷ ଶିଖିଥିଲେ । ଏହି ଚାଷ ଶିଖିବା ପରେ ଏକ ବର୍ଷ ପୂର୍ବେ ପରୀକ୍ଷାମୂଳକ ଭାବେ ୬୦ଟି ସେଓ ଗଛ ଚାରା ହିମାଚଳ ପ୍ରଦେଶ ରାଜ୍ୟରୁ ଆଣି ନିଜ ବଗିଚାରେ ଲଗାଇଥିଲେ । ଏହା ଦେଖି ପ୍ରଥମେ ଗ୍ରାମବାସୀମାନେ ରବୀନ୍ଦ୍ରଙ୍କୁ ସମାଲୋଚନା କରିବା ସହ ଯାଜପୁରରେ ସେଓ ଫଳାଇବା ଅସମ୍ଭବ ବୋଲି କହୁଥିଲେ ।