ଯାଜପୁର: ଆଜି(ବୁଧବାର) ହେଉଛି ପବିତ୍ର କୁମାର ପୂର୍ଣ୍ଣିମା । କୁମାରୀ ମାନଙ୍କ ଏକ ବିଶେଷ ପର୍ବ । ଏହି ଅବସରରେ ଯାଜପୁର ସଦାନନ୍ଦପୁର ଗାଁରେ ଏହି ପର୍ବକୁ କିଛି ନିଆରା ଢ଼ଙ୍ଗରେ ପାଳନ କରିବାର ପରମ୍ପରା ରହିଛି । କୁମାର ପୂର୍ଣ୍ଣିମା ପୂର୍ବ ରାତ୍ରିରେ ଗାଁ ଅଗଣାରେ କୁମାରୀ ମାନେ କଇଁ ଫୁଲରେ ତିଆରି କରନ୍ତି ବିଭିନ୍ନ ପ୍ରକାରର କୋଠି । ଆଜିକୁ ଅନେକ ବର୍ଷ ପୂର୍ବରୁ ଏହି କୋଠି ପରମ୍ପରା ଚାଲିଆସୁଛି ଏହି ଗାଁରେ । କେବଳ କଇଁ ଫୁଲରୁ ପ୍ରସ୍ତୁତ ହୋଇଥିବା ଏହି କୋଠିକୁ ଦେଖିଲେ ଯେକେହି ମନ୍ତ୍ରମୁଗ୍ଧ ହୋଇଯିବ । ଏହାକୁ ଦେଖିବାକୁ ଜିଲ୍ଲା ତଥା ଜିଲ୍ଲା ବାହାରୁ ଅନେକ ଦର୍ଶକ ଆସିଥାନ୍ତି ।
କୁମାର ପୂର୍ଣ୍ଣିମା ଆସିଲେ ସଦାନନ୍ଦପୁର ଗାଁ ହୋଇ ଉଠେ ଚଳଚଂଚଳ । ସାତ ଦିନ ପୂର୍ବରୁ ପ୍ରତ୍ୟେକ ନିଜ ନିଜ ଚଉଁରା ମୂଳେ ତିଆରି କରିଥା’ନ୍ତି କଇଁଫୁଲର କୋଠି । ଆଉ କୁମାର ପୂର୍ଣ୍ଣିମାର ଠିକ ପୂର୍ବରାତ୍ରିରେ କୁମାରୀ ମାନେ ଗାଁ ଅଗଣାରେ ତିଆରି କରିଥାନ୍ତି ବିରାଟ ବିରାଟ କୋଠି । କୌଣସି ରଂଗ କିମ୍ବା କାଳିରେ ନୁହେଁ କେବଳ କଇଁ ଫୁଲରେ ତିଆରି କରିଥାନ୍ତି ଏହି କୋଠି । ଯାହାକୁ କେହି ନିଜ ଆଖିରେ ନଦେଖିଲେ ବିଶ୍ୱାସ କରିବେ ନାହିଁ । ବର୍ଷ ବର୍ଷ ଧରି ଏହି କୋଠିପୂଜା ପରମ୍ପରା ଚାଲିଆସୁଛି ଏହି ଗାଁରେ । କୋଠିପୂଜା କଲେ ଚନ୍ଦ୍ର ଓ କଇଁଫୁଲର ସମ୍ପର୍କ ଯେପରି, ଠିକ ସେମିତି ଜଣେ ମନର ମଣିଷ ମିଳିବା ସହିତ ସେମାନଙ୍କ ମଧ୍ୟରେ ଉତ୍ତମ ସମ୍ପର୍କ ସୃଷ୍ଟି ହୋଇପାରିବ ବୋଲି ଗାଁର ଯୁବତୀ ମାନେ ବିଶ୍ୱାସ କରିଥା’ନ୍ତି ।