ଅବହେଳିତ ଅବସ୍ଥାରେ ବ୍ୟାସ ସରୋବର ପୀଠ, ପର୍ଯ୍ୟଟକ ଅସନ୍ତୋଷ

ପର୍ଯ୍ୟଟନ ସ୍ଥଳୀର ମାନ୍ୟତା ପାଇବା ପରେ ମଧ୍ୟ ଆଜି ବି ଅବହେଳିତ ବ୍ୟାସ ସରୋବର ପୀଠ। ଯାହାକୁ ନେଇ ପ୍ରାକୃତିକ ପରିବେଶକୁ ମନଭରି ଉପଭୋଗ କରିବାକୁ ଆସୁଥିବା ପର୍ଯ୍ୟଟକ ଅସନ୍ତୋଷ ପ୍ରକାଶ କରିଛନ୍ତି।

ଯାଜପୁର: ଜିଲ୍ଲାର ବ୍ୟାସନଗର ସହର ଉପକଣ୍ଠରେ ରହିଛି ବ୍ୟାସ ସରୋବର ପୀଠ। ଯାହାର ରହିଛି ଅନେକ କିମ୍ବଦନ୍ତୀ । ଏପରିକି ମହାଭାରତରେ ମଧ୍ୟ ଏହି ପୀଠ ସମ୍ପର୍କରେ ଉଲ୍ଲେଖ ରହିଛି। ନିକଟରେ ରାଜ୍ୟ ସରକାର ଏହି ପୀଠକୁ ପର୍ଯ୍ୟଟନ କ୍ଷେତ୍ରର ମାନ୍ୟତା ଦେଇଛନ୍ତି। ଏଠାକାର ପ୍ରାକୃତିକ ପରିବେଶକୁ ଲୋକଙ୍କୁ ବେଶ ଆକୃଷ୍ଟ କରିଥାଏ । ଯାହାକୁ ମନଭରି ଉପଭୋଗ କରିବାକୁ କାହିଁ କେତେ ଦୂରରୁ ପର୍ଯ୍ୟଟକଙ୍କ ସୁଅ ଛୁଟି ଆସିଥାଏ।

ମାତ୍ର ଦୁର୍ଭାଗ୍ୟର କଥା ଏହିକି ଯେ, ଏହି ପୀଠରେ ପର୍ଯ୍ୟଟକଙ୍କ ପାଇଁ ବିଶେଷ ସୁବିଧା ନାହିଁ। ପାନୀୟ ଜଳ ଠାରୁ ଆରମ୍ଭ କରି ଶୌଚାଳୟ ପର୍ଯ୍ୟନ୍ତ ଏଠାରେ କୌଣସି ବ୍ୟବସ୍ଥା ନାହିଁ। ଫଳରେ ଏହି ପୀଠକୁ ବୁଲିବାକୁ ଆସୁଥିବା ପର୍ଯ୍ୟଟକ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି।

ପବିତ୍ର ଭୌମ ଏକାଦଶୀ ତିଥିରେ ଏହି ପୀଠରେ ଥିବା ରାଘବଜୀଉ ମନ୍ଦିରରେ ଆୟୋଜିତ ହୁଏ ସ୍ୱତନ୍ତ୍ର କାର୍ଯ୍ୟକ୍ରମ। ଏହି କାର୍ଯ୍ୟକ୍ରମରେ ସାମିଲ ହେବାକୁ ଅନେକ ପର୍ଯ୍ୟଟକ ଓ ଶ୍ରଦ୍ଧାଳୁଙ୍କ ଭିଡ ଜମିଥାଏ। ପର୍ଯ୍ୟଟନ ଋତୁରେ ଭୋଜି ଭାତର ଆୟୋଜନ କରାଯାଇଥାଏ। ଆଉ ଭୋଜି ଭାତ ଶେଷରେ ସ୍ଥାନୀୟ ଅଞ୍ଚଳରେ ଦୁର୍ଗନ୍ଧମୟ ପରିବେଶ ସୃଷ୍ଟି ହୋଇଥାଏ। ଏହି ସ୍ଥାନକୁ ସଫା କରିବା ପାଇଁ କାହାରି ଆନ୍ତରିକତା ନାହିଁ।

ଅପରପକ୍ଷେ ପର୍ଯ୍ୟଟନର ମାନ୍ୟତା ପାଇଥିବା ଏହି ପୀଠର ବିକାଶ ପାଇଁ ଚିନ୍ତା ନ କରି ସରକାର ଚୁପ ବସି ଯାଇଛନ୍ତି। ଏସମ୍ପର୍କରେ କଳିଙ୍ଗନଗର ଅତିରିକ୍ତ ଜିଲ୍ଲାପାଳଙ୍କୁ ପଚାରିବାରୁ ସେ ଏହାର ସ୍ଥାୟୀ ସମାଧାନ ପାଇଁ ଯୋଜନା ପ୍ରସ୍ତୁତ ହେଉଥିବା କହିଛନ୍ତି।

ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ