ନଦୀବନ୍ଧ ପାର୍ଶ୍ୱରୁ ନବଜାତ ଶିଶୁ କନ୍ୟାର ମୃତଦେହ ଉଦ୍ଧାର

ଯାଜପୁର ଜିଲ୍ଲାର ଧର୍ମଶାଳା ନଦୀ ବନ୍ଧ ରାସ୍ତା ପାର୍ଶ୍ୱରୁ ଆଜି(ବୁଧବାର) ଏକ ସଦ୍ୟଜାତ ଶିଶୁ କନ୍ୟାର ମୃତଦେହ ଉଦ୍ଧାର କରାଯାଇଛି । ଅଧିକ ପଢନ୍ତୁ...

ଯାଜପୁର: ଧର୍ମଶାଳା ନଦୀବନ୍ଧ ରାସ୍ତା ପାର୍ଶ୍ୱରୁ ଆଜି(ବୁଧବାର) ଏକ ସଦ୍ୟଜାତ ଶିଶୁ କନ୍ୟାର ମୃତଦେହ ଉଦ୍ଧାର କରାଯାଇଛି । ବାତ୍ୟା 'ୟସ'ର ପ୍ରଭାବରେ କେହି ବାହାରକୁ ବାହାରି ନଥିବାବେଳେ ଏହାର ପ୍ରକୋପ କମିବା ପରେ ଆଜି ଅପରାହ୍ନରେ ସ୍ଥାନୀୟ ଲୋକେ ଶିଶୁ କନ୍ୟାଟିର ମୃତଦେହ ପଡିଥିବା ଦେଖିବାକୁ ପାଇଥିଲେ। ଖବରପାଇ ଧର୍ମଶାଳା ପୋଲିସ ଶିଶୁ କନ୍ୟାଟିର ମୃତଦେହକୁ ଉଦ୍ଧାର କରିଛି ।

ଅନ୍ୟପଟେ, ସୂଚନା ମୁତାବକ କୁଆଖିଆ ଥାନା ଗୋପାଳପୁର ଗ୍ରାମର ବିନୋଦ ଦାସଙ୍କ ପତ୍ନୀ ମାମିନା ଦାସ ଗତକାଲି ରାତି(ମଙ୍ଗଳବାର)ରେ ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଏକ ଶିଶୁକନ୍ୟାକୁ ଜନ୍ମ ଦେଇଥିଲେ। ଜନ୍ମ ହେବା ପରେ ଶିଶୁ କନ୍ୟାଟିର କୌଣସି କାରଣରୁ ମୃତ୍ୟୁ ଘଟିଥିଲା। ଏହାପରେ ସେମାନେ ଶିଶୁକନ୍ୟାଟିକୁ ଏଠାରେ ଫିଙ୍ଗିଦେଇଥିବା ଜଣାପଡିଛି । ଏନେଇ ଧର୍ମଶାଳା ପୋଲିସ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଯାଇ ଘଟଣା ସମ୍ପର୍କରେ ଅଧିକ ତଦନ୍ତ ଆରମ୍ଭ କରିଛି ।

ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ