ଜଗତସିଂହପୁର: ଜିଲ୍ଲାର ଷଣ୍ଢକୁଦ ଅଞ୍ଚଳର ଜଣେ ଯୁବକ 2 ଲକ୍ଷ ଋଣ ପାଇବା ଲୋଭରେ ଏକ ଠକ ଗ୍ୟାଙ୍ଗକୁ ନିଜର ସମସ୍ତ ଅସଲି କାଗଜପତ୍ର ଦେଇଥିଲେ । ଠକ ଗ୍ୟାଙ୍ଗ ଏହି ଯୁବକଙ୍କ ଆକାଉଣ୍ଟରେ ବେଆଇନ ଅର୍ଥ କାରବାର କରୁଥିଲେ । ତେବେ ଏହି ଠକେଇର ଶିକାର ହୋଇଥିବା କିଛି କୋଲକାତାବାସୀଙ୍କ ଅଭିଯୋଗ ପରେ ପଶ୍ଚିମବଙ୍ଗ ପୋଲିସ ପାରାଦ୍ବୀପରେ ପହଞ୍ଚିଥିବା ଜଣାପଡିଛି ।
ସାଇବର ଠକକୁ ଧରିବା ପାଇଁ ପାରାଦ୍ବୀପରେ ପଶ୍ଚିମବଙ୍ଗ ପୋଲିସ ଷଣ୍ଢକୁଦ ଅଞ୍ଚଳର ରଙ୍ଗମିସ୍ତ୍ରୀ ବିଶ୍ବଜିତ ଜେନାଙ୍କୁ ଲୋନରେ ଦୁଇଲକ୍ଷ ଟଙ୍କା ଦେବାପାଇଁ ଏକ ଫ୍ରଡ଼ କଲ ଆସିଥିଲା । କଲରେ କୁହାଯିବା ଅନୁଯାୟୀ ଯୁବକ ନିଜର ସମସ୍ତ ଅରିଜିନାଲ କାଗଜପତ୍ର ଏପରିକି ନିଜ ବ୍ୟାଙ୍କ ଆକାଉଣ୍ଟ, ଏଟିଏମ ଓ ନିଜ ସିମ କାର୍ଡ କୋରିଅର ମାଧ୍ୟମରେ ଦିଲ୍ଲୀ ପଠାଇ ଦେଇଥିଲେ । ଦୁଇ ଲକ୍ଷ ଋଣ ପାଇବା ଲୋଭରେ ଏକ ଠକ ଗ୍ୟାଙ୍ଗକୁ ନିଜର ସମସ୍ତ ଅସଲି କାଗଜପତ୍ର ଦେଇଥିଲେ ।
ନିଜ କାଗଜପତ୍ର ସହିତ ପଚାଶ ହଜାର ଦେଇସାରିବା ପରେ ବାରମ୍ବାର ଫୋନ କରି ନିରାଶ ହୋଇପଡିବା ପରେ କାହାକୁ ନ ଜଣାଇ ଚୁପ ହୋଇ ନିଜକର୍ମରେ ବ୍ୟସ୍ତ ରହିଥିଲେ । ଏହି ଘଟଣାକୁ 1 ବର୍ଷ ବିତିଯିବା ପରେ ଶନିବାର କୋଲକାତାର ତିନିଜଣିଆ ପୋଲିସ ଟିମ ପହଞ୍ଚିବା ପରେ ଘଟଣାର ରହସ୍ୟ ଲୋକଲୋଚନକୁ ଆସିଛି । ଦୁଇ ଲକ୍ଷ ଟଙ୍କାର ଋଣ ଲୋଭରେ ନିଜର ସମସ୍ତ ଅସଲି କାଗଜପତ୍ର ଓ ନିଜର ସିମକାର୍ଡ ଦେଇ ଫସିଛନ୍ତି ଏହି ନିରୀହ ଯୁବକ ।
ଏହି ଭୟଙ୍କର ଠକେଇର ଚେର ଲମ୍ବିଛି ପାରାଦ୍ବୀପରୁ ଦିଲ୍ଲୀ ଓ ଦିଲ୍ଲୀରୁ କୋଲକାତା । ବିଭିନ୍ନ ଅଞ୍ଚଳରୁ ଯୁବକମାନଙ୍କୁ ଅନଲାଇନରେ ଚାକିରୀ ଓ ଋଣ କରାଇଦେବାର ପ୍ରତିଶୃତି ଦେବାପରେ ସେମାନଙ୍କ ପାଖରୁ କିଛି ଅର୍ଥ କୋରିଅର ମାଧ୍ୟମରେ ନେବା ପରେ ବାକି ଅର୍ଥକୁ ଏହି ଯୁବକଙ୍କ ଆକାଉଣ୍ଟରେ ଲେଣଦେଣ ହେଉଥିଲା । ଏ ସମ୍ପର୍କରେ ଶନିବାର ପାରାଦ୍ବୀପରେ କୋଲକାତା ପୋଲିସ ପହଞ୍ଚିବା ପରେ ଘଟଣା ତଦନ୍ତ ଆରମ୍ଭ କରିଛି । ଏହି ଘଟଣାରେ କୋଲକାତାରେ ବହୁଲୋକ ଠକେଇର ଶିକାର ହୋଇଥିବାରୁ କୋଲକାତା ପୋଲିସ ଅଧିକ ଛାନଭିନ କରିବା ପାଇଁ ପାରାଦ୍ବୀପରେ ପହଞ୍ଚିଥିବା ଜଣାପଡିଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
