ଜଗତସିଂହପୁର :ଜଗତସିଂହପୁର ଜିଲ୍ଲା ତିର୍ତ୍ତୋଲ ଥାନା ଅନ୍ତର୍ଗତ କନକପୁର ଗ୍ରାମରେ ବାଣ ବିସ୍ଫୋରଣ ଘଟି ଚାରି ପିଲା ଗୁରୁତର ଭାବେ ଆହତ ହୋଇଛନ୍ତି । ପ୍ରଥମେ ଗୁରୁତରଙ୍କୁ ମଣିଜଙ୍ଗା ମେଡ଼ିକାଲ ଓ ପରେ ଜଗତସିଂହପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ଖବର ଅନୁସାରେ ଝଙ୍କଡ଼ ଶାରଳାଙ୍କ ମନ୍ଦିରରେ ଝାମୁଯାତ୍ର ସମୟରେ ବାଣ ଫୁଟାଯାଇଥିଲା । ତେବେ କେତେକ ବାଣ ନଫୁଟି ପଡ଼ି ରହିଯାଇଥିଲା । ଆଜି ସ୍ଥାନୀୟ ଅଞ୍ଚଳରେ କିଛି ପିଲା ଖେଳୁଥିବା ସମୟରେ ସେହି ଅଫୁଟା ବାଣକୁ ଆଣି ନିଆଁ ଲଗାଇଥିଲେ । ତାହା ନଫୁଟିବାରୁ ସେମାନେ ବାଣ ପାଖକୁ ଯାଇ ଦେଖିବା ସମୟରେ ହଠାତ ବାଣ ଫୁଟିଯାଇଥିଲା । ଫଳରେ ସେମାନଙ୍କ ମଧ୍ୟରୁ ଦୁଇଜଣ ଗୁରୁତର ହୋଇଥିବାବେଳେ ଅନ୍ୟ ଦୁଇ ପିଲା ସାମାନ୍ୟ ଆହତ ହୋଇଛନ୍ତି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ