ଗଞ୍ଜାମ: ଚିକିଟି ବ୍ଳକ ଅନ୍ତର୍ଗତ ରାମେୟାପାଟଣା ଗ୍ରାମରେ ସମୁଦ୍ର ମଧ୍ୟକୁ ମାଛ ମାରିବାକୁ ଯାଉଥିବା ସମୟରେ ଅଘଟଣ । ସମୁଦ୍ର ଅଶାନ୍ତ ହୋଇପଡିଥିବା ଯୋଗୁଁ ଘଟିଛି ଏପରି ଘଟଣା । ବଡ ବଡ ଢେଉ ମାଡରେ ଏକ ମାଛଧରା ଡଙ୍ଗା ଓଲଟି ପଡିଥିବା ବେଳେ ପାଞ୍ଚ ଜଣ ମତ୍ସ୍ୟଜୀବି ସମୁଦ୍ର ମଧ୍ୟରେ ଫଶି ରହିଥିଲେ । ଆଉ ଏହି ସମୟରେ ନିକଟବର୍ତ୍ତୀ ଗ୍ରାମର ଲୋକେ ଦେଖିବା ପରେ ଫଶି ରହିଥିବା ବ୍ୟକ୍ତିଙ୍କୁ ଉଦ୍ଧାର କରିଛନ୍ତି ।
ଢେଉ ମାଡ଼ରେ ଢଳିଲା ଡଙ୍ଗା
ସମୁଦ୍ର ଅଶାନ୍ତ ହୋଇ ସେଠାରେ କୂଳ ଲଘିଂ ଆଗକୁ ଆଗକୁ ମାଡି ଆସୁଥିବା ବେଳେ ବହୁ ଘର ମଧ୍ୟ ଭାଙ୍ଗି ଗଲାଣି । ଆଉ ଏଭଳି ବିପଦ ସମୟରେ ସମୁଦ୍ର ଅଶାନ୍ତ ରହିଥିଲେ ବି ପେଟ ପୋଷିବା ପାଇଁ କେତେକ ମତ୍ସ୍ୟଜୀବୀ ବାଧ୍ୟ ହୋଇ ସମୁଦ୍ରକୁ ମାଛ ମାରିବାକୁ ଯାଇଥିଲେ । କିନ୍ତୁ ଢେଉ ମାଡ଼ରେ ଡ଼ଙ୍ଗା ଓଲଟି ପଡ଼ିଥିଲା । ଡ଼ଙ୍ଗାରେ ଥିବା ପାଞ୍ଚ ଜଣ ସମୁଦ୍ରରେ ବୁଡ଼ି ଯାଉଥିବା ଦେଖି ଗ୍ରାମବାସୀ ଅନ୍ୟ ଏକ ଡ଼ଙ୍ଗା ସାହାର୍ଯ୍ୟରେ ସେମାନଙ୍କୁ ଉଦ୍ଧାର କରିଥିଲେ ।