ଭଞ୍ଜନଗର: ସ୍ବାମୀର ଆକ୍ରମଣରେ ଲହୁଲୁହାଣ ମହିଳା । ଏମିତି ଏକ ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଗୁଗୁଡାରେ । ଏକ ଭଡାଘରେ ରହୁଥିଲେ ପଦ୍ମନାଭ ସାହୁଙ୍କ ତୃତୀୟ ସ୍ତ୍ରୀ ଓ ପୁଅ । ପଦ୍ମନାଭଙ୍କ ପୂର୍ବରୁ ଦୁଇଟି ସ୍ତ୍ରୀ ରହିଛନ୍ତି ହେଲେ ତୃତୀୟ ସ୍ତ୍ରୀ ହୀରା ନାଇକକୁ ସବୁବେଳେ ସେ ମାରପିଟ କରୁଥିଲେ । କିନ୍ତୁ 15 ତାରିଖ ଦିନ ସୀମା ଲଙ୍ଘି ଯାଇଥିଲେ ପଦ୍ମନାଭ । ସ୍ତ୍ରୀ ହୀରାକୁ ଲୁହାରଡ଼ରେ ବାଡେଇ ଗୋଡ଼ ଦୁଇଟିକୁ ଭାଙ୍ଗି ଦେଇଥିବାବେଳେ ହାତ ମଧ୍ୟ ଭାଙ୍ଗି ଦେଇଛନ୍ତି ।
ସ୍ବାମୀର ଅକଥନୀୟ ନିର୍ଯାତନା; ବନ୍ଦ କୋଠରୀରୁ ଅସହାୟ ମହିଳା ଉଦ୍ଧାର ଯାହାଫଳରେ ହୀରା ଘର ଭିତରେ ଯନ୍ତ୍ରଣାରେ ଛଟପଟ ହେଉଥିଲେ । କଥା ଲୋକଲୋଚନକୁ ଆସିଯିବ ବୋଲି ହୀରାକୁ ମେଡିକାଲକୁ ନ ନେଇ ନିଜେ ପଦ୍ମନାଭ ବ୍ୟାଣ୍ଡେଜ କନା ଆଣି ପ୍ରାଥମିକ ଚିକିତ୍ସା କରିଥିଲେ । ପରେ ତାଲା ପକାଇ ମହିଳାଙ୍କୁ ବନ୍ଦୀ କରି ରଖିଥିଲେ ।
ବନ୍ଦ ଘରୁ ମହିଳା ଓ ତାଙ୍କ ପୁଅର କାନ୍ଦ ଶୁଣି ପାଖ ସାହି ଲୋକ ପୋଲିସକୁ ଖବର ଦେଇଥିଲେ । ପୋଲିସ ଆସି ତାଲା ଭାଙ୍ଗି ମହିଳା ଓ ପୁଅଙ୍କୁ ଘରୁ ଉଦ୍ଧାର କରି ମେଡିକାଲ ନେବା ପରିବର୍ତ୍ତେ ମହିଳାଙ୍କ ବାପ ଘର ପଞ୍ଚଭୂତିରେ ଛାଡି ଚାଲିଯାଇଛନ୍ତି । ସେପଟେ ଘଟଣାରେ ପଦ୍ମନାଭ ହୀରାଙ୍କୁ ଓ ତାଙ୍କ ପରିବାରକୁ ଖୁଲମଖୁଲା ଧମକ ବି ଦେଇଥିବା ଅଭିଯୋଗ ହୋଇଛି । ମାତ୍ର ଏ ଘଟଣାରେ ପୋଲିସ କ୍ୟାମେରା ସାମ୍ନାରେ ମୁହଁ ଖୋଲିନାହିଁ ।
ସୂଚନା ଯୋଗ୍ୟ, ପଦ୍ମନାଭ କରସିଙ୍ଗି ଛକରେ ଘର କାମ କରୁଥିଲେ । ସେପଟେ ପଞ୍ଚଭୂତି ସାହିର ହୀରା ସେଠାକୁ କାମ କରିବାକୁ ଯାଉଥିଲେ । କିଛିଦିନ ପରେ ଉଭୟଙ୍କ ଭିତରେ ପ୍ରେମ ସମ୍ପର୍କ ଗଢିଉଠିଥିଲା ପରେ ବିବାହ ବି କରିଥିଲେ । ହୀରା ଏକ ପୁତ୍ର ସନ୍ତାନ ଜନ୍ମ ଦେବା ପରେ ନିର୍ଯାତନା ଆରମ୍ଭ ହୋଇଯାଇଥିଲା । ସେପଟେ ହୀରା ହରିଜନ ହୋଇଥିବାରୁ ତାଙ୍କୁ କେହିବି ସହାୟତା ପାଇଁ ହାତ ବଢାଉନଥିବା ଏବେ ଚିନ୍ତାର କାରଣ ପାଲଟିଛି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
