ଗଜପତି: ଗଭୀର ଅବପାତ ରୂପ ନେଲା ବଙ୍ଗୋପସାଗରରେ ସୃଷ୍ଟ ଲଘୁଚାପ । ଏହାର ପ୍ରଭାବରେ ଗଜପତି ଜିଲ୍ଲାରେ ସୋମବାର ଠାରୁ ପ୍ରବଳ ବର୍ଷା ଜାରି ରହିଛି । ଘଡିଏ ପାଇଁ ବି ବର୍ଷା ଥମୁନଥିଲା ବେଳେ ଘରୁ ବାହାରିବା ମୁସ୍କିଲ ହୋଇପଡିଛି । ସେପଟେ ଲଗାଣ ବର୍ଷା ଜାରି ଥିବାରୁ ପାହା଼ଡିଆ ଅଞ୍ଚଳରେ ଭୂସ୍ଖଳନ ଆଶଙ୍କା ଉପୁଜିଛି । ଏଣୁ କାଶୀନଗର, ରା.ଉଦୟଗିରି, ରାୟଗଡ ଏବଂ ଗୁମ୍ମା ଭଳି ୪ ବ୍ଲକର ୫୦୦ ଲୋକଙ୍କୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇ ରନ୍ଧାଖାଦ୍ୟ ଯୋଗାଯାଉଛି ।
ସ୍ଥାନାନ୍ତରିତଙ୍କ ମଧ୍ୟରେ ଜିଲ୍ଲାର ରା.ଉଦୟଗିରି ବ୍ଲକର ୭୦ ପରିବାର, ଗୁମ୍ମା ବ୍ଲକର ୪୮ଟି ପରିବାର, କାଶୀନଗର ବ୍ଳକର 20ପରିବାର, ରାୟଗଡ ବ୍ଳକ ୭୦ ପରିବାର ରହିଛନ୍ତି । ଯଦି ଆବଶ୍ୟକ ହୁଏ ଅଧିକ ଲୋକଙ୍କୁ ମଧ୍ୟ ସ୍ଥାନାନ୍ତର କରାଯିବ ବୋଲି ପ୍ରଶାସନ କହିଛି । ଏଥିସହ ସମସ୍ତଙ୍କୁ ସବୁ ପ୍ରକାର ସୁବିଧା ଯୋଗାଇବା ସହ ସ୍ଥିତିର ନିୟନ୍ତ୍ରଣ ପାଇଁ ପ୍ରଶାସନ ଜୋରସୋରରେ ଲାଗିପଡିଛି ।
ଗତ ୨୪ଘଣ୍ଟାରେ ଗଜପତିରେ ହାରାହାରୀ ୯୫.୪୮ ମିଲିମିଟର ବର୍ଷା ରେକର୍ଡ ହୋଇଛି । ଲଘୁଚାପ ପ୍ରଭାବରେ 2 ଦିନ ବର୍ଷା ଛେଚୁଥିବାରୁ ଲୋକେ ବାତ୍ୟା ଭୟରେ ଆତଙ୍କିତ । ଆଖି ଆଗରେ ତିତିଲିର ତାଣ୍ଡବ ନାଚି ଉଠୁଛି । ଏଥିଯୋଗୁଁ ଲୋକ ମଧ୍ୟ ସତର୍କ ରହିବା ସହ ପ୍ରଶାସନର ତ୍ବରିତ ପଦକ୍ଷେପକୁ ଗ୍ରହଣ କରିଥିବା ଦେଖାଦେଇଛି । ପ୍ରଶାସନର ପଦକ୍ଷେପକୁ ଲୋକେ ଗ୍ରହଣ କରିବା ସହ ସେମାନଙ୍କୁ ସମସ୍ତ ପ୍ରକାର ସୁବିଧା ଯୋଗାଇ ଦିଆଯାଉଥିବା ଯୋଗୁଁ ସନ୍ତୋଷ ବ୍ୟକ୍ତ କରିଛନ୍ତି । ସେପଟେ ଜିଲ୍ଲାରେ ଲଗାଣ ବର୍ଷା ଜାରି ରହିଥିବାରୁ ବଂଶଧାରା ଏବଂ ମହେନ୍ଦ୍ର ତନୟା ନଦୀରେ ଜଳସ୍ତର ବୃଦ୍ଧି ପାଇଛି ।