ଗଜପତି:ପାରଳାଖେମୁଣ୍ଡି ଉପକଣ୍ଠରେ ଥିବା ଗଜପତି ନର୍ସିଂ କଲେଜର କ୍ଲାସ୍ରୁମ୍ରୁ ଜଣେ ଛାତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି । ମୃତ ଛାତ୍ରୀ ଗଞ୍ଜାମ ଜିଲ୍ଲା ଗୋପାଳପୁର ନିକଟସ୍ଥ ହରିପୁର ଗାଁର ଅଖିଳା ବେହେରା । କଲେଜର ଅଧ୍ୟକ୍ଷାଙ୍କ ନିର୍ଯାତନା ସହିନପାରି ଅଖିଳା ଆତ୍ମହତ୍ୟା କରିଥିବା ତାଙ୍କ ସହପାଠୀ ଅଭିଯୋଗ କରିଛନ୍ତି । ସେପଟେ ଝିଅକୁ ହତ୍ୟା କରି ଝୁଲାଇ ଦିଆଯାଇଥିବା ଅଭିଯୋଗ କରିଛନ୍ତି ମୃତକଙ୍କ ବାପା ।
ଏହି ଘଟଣା ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ଆଲୋଡ଼ନ ସୃଷ୍ଟି ହୋଇଛି । କଲେଜ୍ ଅଧ୍ୟକ୍ଷା ଛାତ୍ରୀଙ୍କୁ ମାନସିକ ନିର୍ଯାତନା ଦେଉଥିବା ଅଭିଯୋଗ ହୋଇଛି । କଲେଜରେ ଓଡିଆ କହିଲେ ଫାଇନ୍ ଦେବାକୁ ପଡେ । କେବଳ ସେତିକି ନୁହେଁ, କଲେଜ ହଷ୍ଟେଲରେ ଦୁଇଟି ଗାଧୁଆ ଘର ରହିଥିବା ବେଳେ ସେଠାରେ ମଧ୍ୟ ଠିକ ଭାବେ ପାଣି ଆସୁନାହିଁ । ଏହାକୁ କହିଲେ କେହି କର୍ଣ୍ଣପାତ କରୁନାହାନ୍ତି । ନିତ୍ୟକର୍ମ ସାରି କ୍ଲାସ୍କୁ ଯିବା ବିଳମ୍ବ ହେଉଛି । କଲେଜକୁ ବିଳମ୍ବରେ ପହଞ୍ଚିଲେ ଫାଇନ୍ କରାଯାଉଛି । ବର୍ତ୍ତମାନ ପରୀକ୍ଷା ଚାଲିଛି । ବୁଧବାର ପରୀକ୍ଷା ହଲରେ ଅଖିଳା ଲେଖୁଥିବା ବେଳେ ସେ କପି କରି ଲେଖୁଥିବା ଦର୍ଶାଇ କଲେଜ ଅଧ୍ୟକ୍ଷା ଅପମାନିତ କରିଥିଲେ । ବାରମ୍ବାର କଲେଜ୍ ଅଧ୍ୟକ୍ଷାଙ୍କ ନିର୍ଯାତନା ସହିନପାରି ସେ ଏଭଳି ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ସେପଟେ ଛାତ୍ରୀଙ୍କ ଅଭିଯୋଗକୁ କଲେଜ ଅଧ୍ୟକ୍ଷା ଖଣ୍ଡନ କରିଛନ୍ତି ।