ଗଜପତି: ଯୁବକଙ୍କୁ ଥଇଥାନ କରିବା ପାଇଁ ଗୁମା ଠାରେ ନିର୍ମାଣ ହୋଇଛି ଦୋକାନ ଗୃହ । ୨୦ ଲକ୍ଷ ଟଙ୍କା ବ୍ୟୟରେ ନିର୍ମିତ ଏହି ଦୋକାନ ଘର ଗୁଡିକ ଖତ ଖାଉଥିଲେ ସୁଦ୍ଧା କାହାରିକୁ ଆବଣ୍ଟନ କରାଯାଉନାହିଁ। ଏହାକୁ ନେଇ ସ୍ଥାନୀୟ ଅଞ୍ଚଳରେ ଜନ ଅସନ୍ତୋଷ ତୀବ୍ର ହେବାରେ ଲାଗିଛି । ସରକାରୀ ପାଣ୍ଠିକୁ ଖର୍ଚ୍ଚ କରି କିଭଳି ନଷ୍ଟ କରାଯାଏ ତାହାର ଏହା ଅନ୍ୟତମ ଉଦାହରଣ ଦେଇ ଲୋକେ ଅଭିଯୋଗ କରିଛନ୍ତି । ଏହି ବ୍ଲକରେ ବିଭିନ୍ନ ସରକାରୀ ଯୋଜନା ମଧ୍ୟମରେ ଲୋକଙ୍କୁ ରୋଜଗାରକ୍ଷମ କରାଇବା ପାଇଁ ବିଭିନ୍ନ ସମୟରେ ପ୍ରଶାସନ ବିଭିନ୍ନ କାର୍ଯ୍ୟକ୍ରମ ହାତକୁ ନେଉଛି । ହେଲେ କିଛି ଖାମଖିଆଲି ମନୋଭାବ ରଖୁଥିବା ଅଧିକାରୀ ଏବଂ ନିର୍ବାଚିତ ପ୍ରତିନିଧୀଙ୍କ ପାଇଁ ଅନେକ ଯୋଜନା ବାଟବଣା ହେଉଛି।
ଦୀର୍ଘ ବର୍ଷ ହେଲା ଏହି କାମ ଆରମ୍ଭ ହୋଇଥିବା ବେଳେ ଗତ ପ୍ରାୟ ବର୍ଷକ ତଳେ ଏହାର କାମ ଶେଷ ହୋଇଛି । କିନ୍ତୁ ଏହାର ଏଯାଏଁ ବଣ୍ଟନ ହୋଇପାରିନାହିଁ । ଫଳରେ ଏହା ଖତ ଖାଉଛି । ଏପରିକି ନୂତନ ଭାବେ ନିର୍ମାଣ ହୋଇଥିବା ଦୋକାନ ଗୃହ ଉପରେ ବର୍ତ୍ତମାନ ଗଛ ଲତା ମାଡ଼ିଗଲାଣି । 2015-16 ଆର୍ଥିକ ବର୍ଷରେ ପ୍ରାୟ 20 ଲକ୍ଷ ଟଙ୍କା ବ୍ୟୟରେ ଏହାର ନିର୍ମାଣ କାମ ଆରମ୍ଭ ହୋଇଥିଲା । ବିଜୁ କନ୍ଧମାଳ ଗଜପତି ଯୋଜନା ମାଧ୍ୟମରେ ନିର୍ମିତ ଏହି ଦୋକାନ ଗୃହ କାମ ଚଳିତ ବର୍ଷ ଶେଷ ହେବା ପରେ ପଂଚାୟତକୁ ହସ୍ତାନ୍ତର କରିଦିଆଯାଇଛି ।