ପାରଳାଖେମୁଣ୍ଡି: ଖରା, ବର୍ଷା, ଶୀତରେ ଖୋଲା ଆକାଶ ତଳେ ଜୀବନ ବିତାଉଛନ୍ତି ଶହ ଶହ ବାସହୀନ । ଏମାନଙ୍କୁ ରାତିରେ ସୁରକ୍ଷିତ ଭାବେ ରହିବା ସୁବିଧା ଯୋଗାଇ ଦେବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେବା ପରେ ପାରଳାଖେମୁଣ୍ଡି ଠାରେ ଆରମ୍ଭ ହୋଇଛି ରାତ୍ରିକାଳୀନ ଆଶ୍ରୟସ୍ଥଳୀ ନିର୍ମାଣ କାମ । ହେଲେ ଏହି କୋଠା ନିର୍ମାଣ ପାଇଁ ଦିଆଯାଇଥିବା ସମୟ ସୀମା ସରି ଆହୁରି ଅନେକ ଦିନ ବିତି ସାରିଥିଲେ ମଧ୍ୟ ଏହା ସରିପାରୁନାହିଁ । ଫଳରେ ବାସହୀନ ମାନେ ଖୋଲା ଆକଶ ତଳେ ଜୀବନ ବିତାଉଛନ୍ତି ।
ଯାହାକି ଆଗକୁ ବର୍ଷାଦିନ ଆସୁଥିବାରୁ ସେମାନଙ୍କ ପାଇଁ ସମସ୍ୟା ସୃଷ୍ଟି କରିପାରେ । ପ୍ରାୟ 50ଲକ୍ଷ ଟଙ୍କା ବ୍ୟୟରେ ନିର୍ମାଣାଧୀନ ଏହି କୋଠା କାମ ପାଇଁ ଦିଆଯାଇଥିବା ସମୟ ସରିବାର ଅନେକ ଦିନ ବିତିସାରିଲାଣି । ତଥାପି ଏହା ସରିବା ତ ଦୂରର କଥା ଅଧାକାମ ବି ହୋଇନାହିଁ । ଯାହାକୁ ନେଇ ସାଧାରଣ ଲୋକେ ଅସନ୍ତୋଷ ପ୍ରକାଶ କରିବା ସହ ଠିକାଦାର ଏବଂ ଯନ୍ତ୍ରୀଙ୍କ ମଧ୍ୟରେ ରହିଥିବା ମଧୁଚନ୍ଦ୍ରିକା ଯୋଗୁଁ କାମ ହେବାରେ ବିଳମ୍ବ ହେଉଥିବା ଅଭିଯୋଗ କରିଛନ୍ତି ।