ଗଜପତି: ସମଗ୍ର ରାଜ୍ୟରେ କୋରୋନା ଆକ୍ରାନ୍ତଙ୍କ ସଂଖ୍ୟା କ୍ରମାଗତ ବୃଦ୍ଧି ପାଉଥିବାବେଳେ ଗଜପତି ଜିଲ୍ଲାରେ ମଧ୍ୟ ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଉଛି। ଏନେଇ ସମସ୍ତେ ଚିନ୍ତିତ । ତେଣୁ ସ୍ଥିତିର ସମୀକ୍ଷା ପାଇଁ ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ଗଜପତି ଜିଲ୍ଲା ଗସ୍ତରେ ଆସିଥିଲେ । ଏହି ସମୟରେ ସେ ସାଙ୍ଗରେ ଆଣିଥିବା ବ୍ରହ୍ମପୁର ଆଇଟିଆଇ ଛାତ୍ରଛାତ୍ରୀଙ୍କ ଦ୍ବାରା ନିର୍ମିତ ଫେସ୍ ମାସ୍କକୁ ବିଭିନ୍ନ ସରକାରୀ କର୍ମଚାରୀ ଏବଂ ଗଣମାଧ୍ୟମ ପ୍ରତିନିଧିଙ୍କୁ ପ୍ରଦାନ କରିଥିଲେ ।
ବର୍ତ୍ତମାନ କୋରୋନା ମୁକାବିଲା ପାଇଁ ପ୍ରଶାସନ ଯେଉଁସବୁ ପଦକ୍ଷେପ ଗ୍ରହଣ କରୁଛି ତାହାକୁ ନେଇ ସେ ସନ୍ତୋଷ ପ୍ରକାଶ କରିବା ସହ ସମସ୍ତେ ପ୍ରଶାସନକୁ ସହଯୋଗ କରିବାର ଆବଶ୍ୟକତା ରହିଥିବା କହିଛନ୍ତି । ଏ ଅବସରରେ ତିତିଲି ବାତ୍ୟା ସମୟରେ ହୋଇଥିବା କ୍ଷୟକ୍ଷତି ଏବଂ ଏହି ଦୁଇ ବର୍ଷ ମଧ୍ୟରେ ହୋଇଥିବା ପୁନଃଉଦ୍ଧାର କାମର ମଧ୍ୟ ତଦାରଖ କରିଥିଲେ ।
ଆସନ୍ତା ୨୬ ତାରିଖ ଦିନ ରାଜ୍ୟ ବିପର୍ଯ୍ୟୟ ପରିଚାଳନା କମିଟି ବୈଠକ ଥିବାବେଳେ ସାଂସଦ ଏହାର ଜଣେ ସଦସ୍ୟ ରହିଛନ୍ତି । ତେଣୁ ସେ ସେହି ବୈଠକରେ ଉପସ୍ଥିତ ରହିବେ ଏବଂ ବିଭିନ୍ନ ବିଷୟ ଉପରେ ଆଲୋଚନା କରିବା ସହ ବଳକା କାମକୁ କିଭଳି ଅତିଶୀଘ୍ର ସାରିବା ଦିଗରେ ସରକାରଙ୍କ ଦୃଷ୍ଟି ଆକର୍ଷଣ କରିବେ ବୋଲି କହିଛନ୍ତି ।