ଢେଙ୍କାନାଳ:ପ୍ଲାଣ୍ଟରେ ବିସ୍ଫୋରଣ । ଢେଙ୍କାନାଳ ଜିଲ୍ଲାର କାମାକ୍ଷାନଗର-ପରଜଙ୍ଗ ଥାନା କୁଲେଇ ସ୍ଥିତ ଜିଏମ ଆଇରନ ପ୍ଲାଣ୍ଟରେ ବିସ୍ଫୋରଣ ଘଟିଛି । ଗତକାଲି ପ୍ଲାଣ୍ଟର ୩ ନଂ ଫର୍ନେସ ବ୍ଲାଷ୍ଟ ହୋଇଥିବା ବେଳେ ୬ ଶ୍ରମିକ ଆହତ ହୋଇଛନ୍ତି । ସମସ୍ତ ଆହତଙ୍କୁ ଅନୁଗୋଳ ଜିଲ୍ଲାର ବଅଁରପାଳ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ଆହତ ଶ୍ରମିକ ମାନେ ହେଲେ ବିମ୍ବାଧର ବେହେରା, ଆଦିତ୍ୟ ଭୂତିଆ, ମନୋଜ କେସି, ଚିନ୍ମୟ ମହାକୁଡ, ସୁଶୀଲ ଓ ବିରେନ୍ଦ୍ର ଧଳ ବୋଲି ଜଣାପଡିଛି । ଅନ୍ୟପଟେ ଘଟଣାକୁ ଚପାଇ ଦେବାକୁ ପ୍ଲାଣ୍ଟ ମୁଖ୍ୟ ଫାଟକରେ କମ୍ପାନୀ କର୍ତ୍ତୃପକ୍ଷ ତାଲା ପକାଇଥିବା ଚର୍ଚ୍ଚା ହେଉଛି ।
ସୂଚନା ଅନୁସାରେ, ଗତକାଲି(ବୁଧବାର) ଅପରାହ୍ନରେ ପ୍ଲାଣ୍ଟରେ ବିସ୍ଫୋରଣ ହୋଇଥିଲା । ସମସ୍ତ ଆହତ ଶ୍ରମିକମାନଙ୍କୁ କମ୍ପାନୀର ନିଜ ଗାଡିରେ ମେଡିକାଲକୁ ନେଇଯାଇଥିଲା । ତେବେ ଘଟଣାର ସୂଚନା ପାଇ କାମାକ୍ଷାନଗର ଏସଡିପିଓ, ପର୍ଜଙ୍ଗ ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିଲେ । କମ୍ପାନୀ ଭିତରକୁ ଏକ ଜେସିବି ମେସିନ ପ୍ରବେଶ କରୁଥିବାର ଦେଖିବାକୁ ମିଳିଥିଲା । ତେଣୁ କିଛି ବଡ ଧରଣର ଅଘଟଣ ଘଟିଥିବା ଅନୁମାନ କରାଯାଉଛି । କିନ୍ତୁ କମ୍ପାନୀ କର୍ତ୍ତୃପକ୍ଷ କୌଣସି ସୂଚନା ଦେଇ ନାହାଁନ୍ତି ।
ପ୍ରକାଶ ଥାଉକି, ଗତ ଜୁନ ମାସରେ କଣ୍ଟାବଣିଆ ମେରାମଣ୍ଡଳୀ ସ୍ଥିତ ଟାଟା ଷ୍ଟିଲ ପ୍ଲାଣ୍ଟରେ ଷ୍ଟିମ ପାଇପ୍ ଲାଇନ୍ ଫାଟି ବିସ୍ଫୋରଣ ହୋଇଥିଲା । ଏହି ଅଘଟଣରେ ପ୍ଲାଣ୍ଟରେ କାର୍ଯ୍ୟରତ ପ୍ରାୟ ୧୯ ଜଣ କର୍ମଚାରୀ ଗୁରୁତର ହୋଇଥିଲେ । ଏନେଇ ୧୯ ଗୁରୁତରଙ୍କୁ କଟକ ଘରୋଇ ଡାକ୍ତର ଖାନାରେ ଭର୍ତ୍ତି କରାଯାଇଥିଲା । ଖବର ପାଇ ଘଟଣାସ୍ଥଳରେ ଜିଲ୍ଲାପ୍ରଶାସନ ଓ ପୋଲିସ ପ୍ରଶାସନ ପହଞ୍ଚି ତଦନ୍ତ ଆରମ୍ଭ କରିଥିଲା ।