୩୬ବର୍ଷ ପରେ ଢେଙ୍କାନାଳକୁ ଫେରିଲା ଫୁଟବଲ ଟୁର୍ଣ୍ଣାମେଣ୍ଟ

ଢେଙ୍କାନାଳରେ ଫୁଟବଲ ପ୍ରେମୀ ବେଶ୍‌ ଖୁସ। ଦୀର୍ଘ ୩୬ବର୍ଷ ପରେ ଜିଲ୍ଲା ମୁଖ୍ୟ ଷ୍ଟାଡିୟମରେ ଆନ୍ତଃଜିଲ୍ଲା ଫୁଟବଲ ସାହାଣୀ କପ ଆୟୋଜନ କରାଯାଇଛି । ଏହି ଟୁର୍ଣ୍ଣାମେଣ୍ଟରେ ଭଲ ପ୍ରଦର୍ଶନ କରୁଥିବା ଖେଳାଳିଙ୍କୁ ଓଡିଶା ଦଳ ପାଇଁ ସନ୍ତୋଷ ଟ୍ରଫିରେ ସୁଯୋଗ ମିଳେ।

ଢେଙ୍କାନାଳ: ଜିଲ୍ଲା ମୁଖ୍ୟ ଷ୍ଟାଡିୟମରେ ଆନ୍ତଃଜିଲ୍ଲା ଫୁଟବଲ ସାହାଣୀ କପ ଆରମ୍ଭ ହୋଇଯାଇଛି। ଢେଙ୍କାନାଳ ଜିଲ୍ଲା କ୍ରୀଡା ସଂଘ ପକ୍ଷରୁ ଏହାର ଆୟୋଜନ କରାଯାଇଛି । ଗତ ୩ତାରିଖରେ ଢେଙ୍କାନାଳ ସାଂସଦ ମହେଶ ସାହୁ ଏହାକୁ ଉଦ୍‌ଘାଟନ କରିଥିଲେ । ଏଠାରେ 11ତାରିଖ ଯାଏଁ ମ୍ୟାଚ ଚାଲିବ ।

ସ୍ଥାନୀୟ ଦଳ ଢେଙ୍କାନାଳ ବ୍ୟତୀତ କଟକ, ବାଲେଶ୍ବର, ବାରିପଦା, କେନ୍ଦୁଝର,ଗଞ୍ଜାମ ଓ କେନ୍ଦ୍ରାପଡା ଆଦି ୭ଟି ଜିଲ୍ଲାର ଦଳ ଏହି ପ୍ରତିଯୋଗିତାରେ ସାମିଲ ହୋଇଛନ୍ତି। ଏଠାରୁ ଚମ୍ପିଆନ ଦଳ ବରଗଡ ଠାରେ ଫାଇନାଲ ଖେଳିବ ବୋଲି ଜିଲ୍ଲା କ୍ରୀଡା ସଂଘର ସମ୍ପାଦକ ପ୍ରକାଶ କରିଛନ୍ତି। ଏହି ସାହାଣୀ କପରୁ ଭଲ ଭଲ ଫୁଟବଲ ଖେଳାଳି ଚୟନ କରାଯାଇ ଓଡିଶା ଦଳ ପାଇଁ ସନ୍ତୋଷ ଟ୍ରଫିର ସୁଯୋଗ ହାସଲ କରିବେ ବୋଲି ରାଜ୍ୟ ଅଣ୍ଡର ୧୯ ଫୁଟବଲ କୋଚ ପ୍ରକାଶ କରିଛନ୍ତି।

ଢେଙ୍କାନାଳରେ ଦୀର୍ଘ ୩୬ବର୍ଷ ପରେ ଏହି ସାହାଣୀ କପର ଆୟୋଜନ କରାଯାଇଥିବାରୁ ଫୁଟବଲ ପ୍ରେମୀଙ୍କ ବେଶ ଉତ୍ସାହିତ ଅଛନ୍ତି । ଫଳରେ ଖେଳ ଦେଖିବାକୁ ଷ୍ଟାଡିୟମରେ କ୍ରୀଡାପ୍ରେମୀଙ୍କ ଭିଡ ଜମୁଛି । ଏପଟେ ଖେଳିବା ପାଇଁ ଭଲ ବାତାବରଣ ସାଙ୍ଗକୁ ଭଲ ଆୟୋଜନକୁ ନେଇ ବିଭିନ୍ନ ଜିଲ୍ଲାରୁ ଆସିଥିବା ଫୁଟବଲ ଖେଳାଳୀ ବେଶ ଖୁସି ବ୍ୟକ୍ତ କରିଛନ୍ତି।

ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ