ଢେଙ୍କାନାଳ: ରାଜ୍ୟରେ ଜାରି ରହିଛି ତ୍ରିସ୍ତରୀୟ ପଞ୍ଚାୟତ ନିର୍ବାଚନ । ପ୍ରଥମ ଓ ଦ୍ବିତୀୟ ପଞ୍ଚାୟତ ପରୀକ୍ଷାରେ କେତେକ ସ୍ଥାନରେ ନିର୍ବାଚନୀ ହିଂସା ଦେଖିବାକୁ ମିଳିଥିଲା ଫଳରେ ଭୋଟ ଗ୍ରହଣ ବାଧାପ୍ରାପ୍ତ ହୋଇଥିଲା । ସେହି ସମସ୍ତ ସ୍ଥାନରେ ସାନି ମତଦାନ କରାଯିବାକୁ ନିର୍ଦ୍ଦେଶ ଦେଇଥିଲେ ରାଜ୍ୟ ନିର୍ବାଚନ କମିଶନ । ଢେଙ୍କାନାଳ ଜିଲ୍ଲା ଗଁନ୍ଦିଆ ବ୍ଲକ ନିହଲ ପ୍ରସାଦ ପଞ୍ଚାୟତର ୪ଟି ବୁଥରେ ଆସନ୍ତା ୨୩ ତାରିଖରେ ସାନି ମତଦାନ ହେବ ।
ନିହଲ ପ୍ରସାଦ ପଞ୍ଚାୟତର ବୁଥ ନଂ ୨, ୬, ୭ ଓ ୧୧ ରେ ସାନି ମତଦାନ ହେବ । ଗତ ୧୬ ତାରିଖ ପ୍ରଥମ ପର୍ଯ୍ୟାୟରେ ନିହଲ ପ୍ରସାଦ ବୁଥ ନଂ ୨, ୬ ଓ ୭ ବୁଥ ଜବରଦଖଲ କରି ଜବରଦସ୍ତ ଭୋଟ ଦେବା ଯୋଗୁଁ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା । ସେହିପରି ନିହଲ ପ୍ରସାଦ ପଞ୍ଚାୟତର ସରକାରୀ ନୋଡାଲ ଉପ୍ରା ବିଦ୍ୟାଳୟରେ ହୋଇଥିବା ବୁଥ ନଂ ୧୧ ରେ ବ୍ୟାପକ ଭଙ୍ଗାରୁଜା କରିବା ସହ ଦୁର୍ବୃତ୍ତ ମାନେ ଭୋଟ ବାକ୍ସ ଟେକି ନେଇଥିଲେ । ଫଳରେ ଏହି ୪ଟି ବୁଥରେ ଭୋଟ ଗ୍ରହଣ ବାଧାପ୍ରାପ୍ତ ହୋଇଥିଲା । ଏ ସମ୍ପର୍କରେ ଢେଙ୍କାନାଳ ଜିଲ୍ଲାପାଳଙ୍କ ପକ୍ଷରୁ ରାଜ୍ୟ ନିର୍ବାଚନ କମିଶନରଙ୍କ ଦୃଷ୍ଟି ଆକର୍ଷଣ କରାଯାଇଥିଲା । ଏହା ପରେ ସାନି ମତଦାନ ପାଇଁ ରାଜ୍ୟ କମିଶନର ଘୋଷଣା କରିଥିଲେ ।