ଢେଙ୍କାନାଳ: ଗୋଟିଏ ପଟେ କୋଭିଡ୍ ସଂକ୍ରମଣ ଭୟ । ଅନ୍ୟପଟେ ଭକ୍ତିର ଭାବ । ଏହି ଦୋଛକିରେ ପେଷି ହୋଇଯାଇଛି ଢେଙ୍କାନାଳର ପ୍ରସିଦ୍ଧ ଗଜଲକ୍ଷ୍ମୀପୂଜା । ଚଳିତ ବର୍ଷ କେବଳ ପୂଜାରେ ହିଁ ସୀମିତ ରହିଯିବ ଏହି ଉତ୍ସବ । ପ୍ରତିବର୍ଷ ଧୁମଧାମରେ 12 ଦିନ ଧରି ପୂଜା ହୁଏ । ହଜାର ହଜାର ଭକ୍ତଙ୍କ ସମାଗମରେ ଉତ୍ଫୁଲିତ ହୋଇଉଠେ ଢେଙ୍କାନାଳ । ଯାହା ଚଳିତ ବର୍ଷ ଦେଖିବାକୁ ମିଳିବନି ।
ଢେଙ୍କାନାଳ ଗଜଲକ୍ଷ୍ମୀପୂଜାର ପ୍ରସ୍ତୁତି ଆରମ୍ଭ
କୋରୋନା କଟକଣା ପାଇଁ ପୂଜାମଣ୍ଡପର ସାଜସଜ୍ଜା ଉପରେ ରୋକ ଲାଗିଥିବାରୁ ସେହି ଉତ୍ସାହ ଓ ଉଦ୍ଦିପନାରେ ଭଟ୍ଟା ପଡିଯାଇଛି । ହେଲେ ପରମ୍ପରା ବଜାୟ ରଖିବାକୁ ପୂଜା ମଣ୍ଡପର କର୍ମକର୍ତ୍ତାମାନେ ଚେଷ୍ଟା ଜାରି ରଖିଛନ୍ତି ।
ଆସନ୍ତା 30 ତାରିଖ କୁମାର ପୂର୍ଣ୍ଣିମାରୁ, ପୂଜା ଆରମ୍ଭ ହେବାକୁ ଥିବାବେଳେ ପ୍ରତିବର୍ଷ ପରି ସୁନିଆରୁ ସହରର 38ଟି ପୂଜା ପ୍ରତିଷ୍ଠାନ ଶୁଭ ମାଟି ଅନୁକୂଳ କରି ମୂର୍ତ୍ତି ତିଆରି ଚଳାଇଛନ୍ତି । ପୂଜା ପାଇଁ ପ୍ରଶାସନ ସହ ମିଳିତ ଲକ୍ଷ୍ମୀପୂଜା କମିଟିର ବୈଠକ ମଧ୍ୟ ହୋଇଛି ।