ବାଇକକୁ ଧକ୍କା ଦେଲା କାର, ତିନି ଗୁରୁତର

ଢେଙ୍କାନାଳ ଜିଲ୍ଲା ଭୁବନ ବ୍ରାହ୍ମଣୀ ବାଜି ରାଉତ ସେତୁ ଉପରେ ଏକ ବାଇକକୁ ମାରୁତି କାର ଧକ୍କା ଦେବା କାରଣରୁ 3 ଜଣ ଗୁରୁତର ହୋଇଛନ୍ତି।

ଢେଙ୍କାନାଳ: କାର-ବାଇକ ମୁହଁମୁହିଁ ଧକ୍କାରେ ତିନି ଜଣ ଗୁରୁତର । ଢେଙ୍କାନାଳ ଜିଲ୍ଲା ଭୁବନ ବ୍ରାହ୍ମଣୀ ବାଜି ରାଉତ ସେତୁ ଉପରେ ଏକ ବାଇକକୁ ମାରୁତି କାର ଧକ୍କା ଦେବା କାରଣରୁ 3 ଜଣ ଗୁରୁତର ହୋଇଛନ୍ତି।

ଏହି ଦୁର୍ଘଟଣାରେ ବାଇକରେ ଯାଉଥିବା ତିନି ଜଣ ଯୁବକ ଗୁରୁତର ହୋଇଛନ୍ତି । ଗୁରୁତରଙ୍କୁ ଭୁବନ ଡାକ୍ତରଖାନାରେ ଭର୍ତ୍ତି କରାଯାଇଛି । ତିନିଜଣ ଯୁବକ ହେଲେ ଗଁନ୍ଦିଆ ପଞ୍ଚାୟତ ଅନ୍ତର୍ଗତ କରଗୋଳା ଗ୍ରାମର ଖଗେଶ୍ବର ମଳିକ, ମନ୍ଦାର ପଞ୍ଚାୟତ ଅନ୍ତର୍ଗତ ଦଲାର ଗ୍ରାମର ଟୀକା ମଳିକ ଏବଂ ଆଉ ଜଣେ ଭୁବନ ବିଜ୍ଞାପିତ ଅଞ୍ଚଳ ପରିଷଦ ୧୫ ନଂ ଓ୍ବାର୍ଡର ଯୁଧିଷ୍ଠିର ମଳିକ ବୋଲି ଜଣାପଡିଛି।

ତିନିଜଣ ଗୁରୁତର ଥିବାରୁ ତାଙ୍କୁ ଢେଙ୍କାନାଳ ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ତିନିଜଣ ଯୁବକ ଏକ ବାଇକ ଯୋଗେଁ ଗନ୍ଦିଆ ବ୍ଲକରୁ ଭୁବନ ଆସୁଥିବା ସମୟରେ ଅପର ପାର୍ଶ୍ବରୁ ଏହି କାର ବାଇକକୁ ଧକ୍କା ଦେଇଥିଲା । ଭୁବନ ପୁଲିସ ପହଞ୍ଚି କାରକୁ ଜବତ କରିବା ସହ ତଦନ୍ତ ଆରମ୍ଭ କରିଛି ।

ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ