ଢେଙ୍କାନାଳ: ବିରାଶାଳ ବିମାନ ଦୁର୍ଘଟଣାର ଛାନଭିନ ପାଇଁ ଢେଙ୍କାନାଳରେ ଡିଜିସିଏର ତଦନ୍ତ ଜାରି । ବିରାଶାଳ ବିମାନ ପ୍ରଶିକ୍ଷଣ କେନ୍ଦ୍ରରେ ଦୁଇଦିନିଆ ତଦନ୍ତ କରୁଛନ୍ତି ଡିଜିସିଏର ସ୍ୱତନ୍ତ୍ର ଟିମ । ଏଥିପାଇଁ ଡିଜିସିଏ ଦିଲ୍ଲୀରୁ 2 ଜଣିଆ ଟିମରେ ଡେପୁଟି ଡ଼ାଇରେକ୍ଟର ଜସବୀର ସିଂ ଲରଘା ଓ ଏୟାର ସେଫ୍ଟି ଅଫିସର ଦିନେସ କୁମାର ଢେଙ୍କାନାଳ ବିରାଶାଳ ଏୟାର ଷ୍ଟ୍ରିପକୁ ଯାଇ ଯାଞ୍ଚ ଚଳାଇଛନ୍ତି ।
ଏହି ଟିମ କାମାକ୍ଷାନଗରରେ ରହି ଦୁର୍ଘଟଣାର ତନାଘନା ଜାରି ରଖିଛନ୍ତି । କେନ୍ଦ୍ର ସରକାରଙ୍କ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ ଢେଙ୍କାନାଳ ଜିଲ୍ଲାର କାମାକ୍ଷାନଗର ଉପଖଣ୍ଡର ବିରାଶାଳ ଠାରେ ଥିବା ସରକାରୀ ବିମାନ ପ୍ରଶିକ୍ଷଣ କେନ୍ଦ୍ରରେ ଗତ ସୋମବାର ବିମାନ ଦୁର୍ଘଟଣାର କାରଣ କଣ ତାହା ନେଇ ଛାନଭିନ ଚାଲିଛି ।
ଡିଜିସିଏର ଏହି ଉଚ୍ଚ ପଦାଧିକାରୀଙ୍କ ସହ ବେସାମରିକ ବିମାନ ଚଳାଚଳ ବିଭାଗର କେତେକ ବୈଷୟିକ ଅଧିକାରୀ ସାମିଲ ରହିଛନ୍ତି । ସେମାନଙ୍କ ମଧ୍ୟରେ ମୁଖ୍ୟଯନ୍ତ୍ରୀ ମୁକେଶ କୁମାର, ଯନ୍ତ୍ରୀ ଟି.ଟୁଡୁ ରହିଛନ୍ତି । ତେବେ ଗତ ମଙ୍ଗଳବାର ଅପରାହ୍ନରେ ଏହି ଟିମ ବିରାଶାଳ ଏୟାର ଷ୍ଟ୍ରିପରେ ପହଞ୍ଚି ଯାଞ୍ଚ ଆରମ୍ଭ କରିଛନ୍ତି ।