ଦେବଗଡ: ଆଦିବାସୀ ହରିଜନ ତଥା ପଛୁଆବର୍ଗର ଛାତ୍ରଛାତ୍ରୀମାନେ କେନ୍ଦ୍ରୀୟ ବିଦ୍ୟାଳୟ ଢାଞ୍ଚାରେ ମିଳିବ ଉନ୍ନତମାନର ଗୁଣାତ୍ମକ ଶିକ୍ଷା । ଏହି ଲକ୍ଷ୍ୟ ନେଇ 2016ରେ ଦେବଗଡ ଜିଲ୍ଲା ତିଳେଇବଣି ବ୍ଲକ ମହକୁମାରେ ସ୍ଥାପନା କରାଯାଇଥିଲା ଓଡିଶା ଆଦର୍ଶ ବିଦ୍ୟାଳୟ । ମାତ୍ର ଏହି ବିଦ୍ୟାଳୟରେ ଆବଶ୍ୟକ ଭିତ୍ତିଭୂମିର ଅଭାବ ସାଙ୍ଗକୁ ପ୍ରଶାସନିକ ଅବହେଳା ଯୋଗୁଁ ଲକ୍ଷ୍ୟ ସାଧିତ ହୋଇପାରୁ ନାହିଁ ।
ଏହି ବିଦ୍ୟାଳୟକୁ ଦୀର୍ଘ 4 ବର୍ଷ ବିତିଯାଇଛି । ହେଲେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଓ ସ୍ଥାନୀୟ ପ୍ରଶାସନର ଚରମ ଅବହେଳା କାରଣରୁ ଆଜି ଯାଏ ହଷ୍ଟେଲ ନିର୍ମାଣ ହୋଇପାରିନାହିଁ । ଫଳରେ ଏଠାରେ ଅଧ୍ୟୟନ କରୁଥିବା ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ମୋଟ 235 ଜଣ ଛାତ୍ରଛାତ୍ରୀ ଆଜିକୁ 4 ବର୍ଷ ହେବ ପ୍ରତିଦିନ ଦୂରଦୂରାନ୍ତରୁ ଆସୁଛନ୍ତି । ଯେଉଁଥିରେ ଛାତ୍ରଛାତ୍ରୀଙ୍କ ସମୟ ନଷ୍ଟ ହେବା ସହ ଅଭିଭାବକଙ୍କୁ ଅଯଥା ଖର୍ଚ୍ଚାନ୍ତ ହେବାକୁ ପଡୁଛି । କେବଳ ସେତିକି ନୁହେଁ ବିଦ୍ୟାଳୟର ଚାରିପାଖେ ପାଚେରୀ ନଥିବାରୁ ଅସାମାଜିକ ବ୍ୟକ୍ତିଙ୍କ ଅବାଧ ଅନୁପ୍ରବେଶ ଜାରି ରହିଛି । ଫଳରେ ଏଠାରେ ଅଧ୍ୟୟନ କରୁଥିବା ଛାତ୍ରଛାତ୍ରୀ ନିଜକୁ ସୁରକ୍ଷିତ ମଣୁ ନାହାଁନ୍ତି ।