ଦେବଗଡ: ସାହାରା ସାଜିଛି ପଲିଥିନ ଟଣା କୁଡିଆ । ବର୍ଷ ବର୍ଷ ଧରି ଗାଁ ମୁଣ୍ଡରେ ପଲିଥିନ ଟଣା ମାଟି ଘରେ ଜୀବନ ବିତାଉଛନ୍ତି ତିନି ଭଉଣୀ । ନିଷ୍ଠୁର ନିୟତିର ଦାଉରେ ଦୁର୍ବିସହ ପାଲଟିଛି ଜୀବନ । ନା ମୁଣ୍ଡ ଉପରେ ବାପାମାଆଙ୍କ ହାତ ଅଛି, ନା କାହାର ସାହାରା । ବାପମାଆ ଛେଉଣ୍ଡ ତିନି ଭଉଣୀ ପରସ୍ପର ମୁହଁକୁ ଅନାଇ ଦିନ କାଟୁଛନ୍ତି । ଏହି ଯନ୍ତ୍ରଣାଦାୟକ ଚିତ୍ର ଦେଖିବାକୁ ମିଳିଛି ଦେବଗଡ଼ ଜିଲ୍ଲାର ବଡାଛପଲ ଗାଁରେ ।
ବଡାଛପଲ ଗାଁରେ ବାସ କରନ୍ତି ମାଆବାପ ଛେଉଣ୍ଡ ତିନି ଭଉଣୀ ସରସ୍ବତୀ ନାୟକ (16), ସୀମା ନାୟକ (12) ଓ ଲଭଲି ନାୟକ (9) । ଗତ 2014 ମସିହାରେ ମାଆ କେନ୍ଦେଇ ନାୟକ ରୋଗରେ ଆରପାରିକୁ ଚାଲିଯାଇଥିଲା । ପରେ 2015 ମସିହାରେ ପିତା ଚିନ୍ତା ନାୟକ ମଧ୍ୟ ରୋଗାଗ୍ରସ୍ତ ହୋଇ ପ୍ରାଣ ହରାଇଥିଲେ । ଉଭୟ ବାପାମାଆଙ୍କୁ ହରାଇ ଅସହାୟ ହୋଇପଡିଥିଲେ ପାଞ୍ଚ ସନ୍ତାନ । ସେଥିମଧରୁ ବଡ଼ପୁଅ ଅରୁଣ ଓ ଝିଅ ରାଇଧାନୀ ଇତିମଧ୍ୟରେ ବିବାହ କରି ନିଜ ନିଜ ପରିବାର ନେଇ ଅନ୍ୟତ୍ର ରହୁଛନ୍ତି । ହେଲେ ଏବେ ଦୁର୍ବିସହ ଜୀବନ କାଟୁଛନ୍ତି ଆଉ ତିନି ନାବାଳିକା ଭଉଣୀ । ସରସ୍ବତୀ ଜନ୍ମରୁ ଦୃଷ୍ଟିହୀନ ହୋଇଥିବା ବେଳେ ତାଙ୍କ ମୁଣ୍ଡ ଉପରେ ରହିଛି ଦୁଇ ନାବାଳିକା ଭଉଣୀଙ୍କ ବୋଝ ।