ଦେବଗଡ଼: ଲକଡାଉନ କଟକଣା ନେଇ ରାଜ୍ୟର ସମସ୍ତ ସ୍କୁଲ କଲେଜ ବନ୍ଦ ରହିଥିବା ବେଳେ ଅନଲାଇନ ମାଧ୍ୟମରେ ପିଲାଙ୍କୁ ପାଠ ପଢାଇବା ପାଇଁ ସରକାର ନିର୍ଦ୍ଦେଶ ଜାରି କରିଛନ୍ତି । ତେବେ ଦେବଗଡ଼ ଜିଲା ନାଗଡ଼ିହି ଗାଁ ରେ ଥିବା ପିଲାଙ୍କ ଅବସ୍ଥା ଦେଖିଲେ ସରକାରଙ୍କ ଅନଲାଇନ ପାଠ୍ୟକ୍ରମ ଯେ ଏଠାରେ ପ୍ରହସନ ବ୍ୟତୀତ ଆଉ କିଛିନୁହଁ , ତାହା ବେସ ବାରିହୋଇ ପଡୁଛି ।
କେବଳ ସେତିକି ନୁହଁ , ବିଭିନ୍ନ କଲେଜ ଓ ୟୁନିଭରସିଟିରେ ଉଚ୍ଚଶିକ୍ଷା ଲାଭ କରୁଥିବା ଗାଁ ର ଅନେକ ମେଧାବୀ ଛାତ୍ରଛାତ୍ରୀ ମଧ୍ୟ ଅନଲାଇନ ପାଠପଢ଼ାରୁ ବଞ୍ଚିତ ହେଉଛନ୍ତି । ଯାହାକି ଗାଁର ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧକାର ହେବାକୁ ବସିଥିବା ବେଳେ ଏନେଇ ଅଭିଭାବକଙ୍କ ମହଲରେ ତୀବ୍ର ଅସନ୍ତୋଷ ଡେଖାଦେଇଛି । ସାରାଦେଶରେ ମୋବାଇଲ ଓ ଇଣ୍ଟରନେଟ ର ବ୍ୟବହାର ବୃଦ୍ଧିପାଇଥିବା ଲକ୍ଷକରି ସରକାର ଡିଜିଟାଲ ଇଣ୍ଡିଆର ପରିକଳ୍ପନା କରୁଥିବା ବେଳେ ନାଗଡ଼ିହି ଭଳି ଜିଲାର ଅନେକ ଗ୍ରାମାଞ୍ଚଳ ର ଅବସ୍ଥା ଦେଖିଲେ ସରକାରଙ୍କ ଏହି ପରିକଳ୍ପନା ଏଠାରେ ଫେଲ ମାରିଥିବା ସ୍ପଷ୍ଟ ପରିଲକ୍ଷିତ ହୋଇଛି ।
ଦେବଗଡ଼ ରୁ ସରୋଜ ଶତପଥି, ଇଟିଭି ଭାରତ