ଦେବଗଡ:ବଢୁଛି ବ୍ଲକ ଅଧ୍ୟକ୍ଷା ଓ ବିଡ଼ିଓଙ୍କ ମଧ୍ୟରେ ବିବାଦ । ବାହାରୁନି ସମାଧାନର ରାସ୍ତା । ରିଆମାଳ ବ୍ଲକରେ ଦୀର୍ଘଦିନ ଧରି ବ୍ଲକ ଅଧ୍ୟକ୍ଷା ରିତାଞ୍ଜଳି ହାତୀ ଓ ବିଡ଼ିଓ ଦିବ୍ୟଶଙ୍କର ଜୟପୁରିଆଙ୍କ ମଧରେ ଲାଗିଥିବା ବିବାଦ ଥମିବାର ନାଁ ନେଉନାହିଁ । ବରଂ ଏହି ବିବାଦ ଦିନକୁ ଦିନ ଅଧିକ ଘନୀଭୂତ ହେବାରେ ଲାଗିଛି । ବିଗତ ଦିନରେ ବ୍ଲକ ଅଧ୍ୟକ୍ଷା ଓ ବିଡ଼ିଓଙ୍କ ମଧ୍ୟରେ ବିଭିନ୍ନ ଉନ୍ନୟନ ମୂଳକ କାର୍ଯ୍ୟକୁ ନେଇ ବାରମ୍ବାର ବିବାଦୀୟ ପରିସ୍ଥିତି ସୃଷ୍ଟି ହୋଇଛି । ଗତ କିଛିମାସ ପୂର୍ବରୁ ଏକ ଉନ୍ନୟନ ମୂଳକ କାର୍ଯ୍ୟକୁ କେନ୍ଦ୍ରକରି ଅଧ୍ୟକ୍ଷା ବିଡ଼ିଓଙ୍କୁ ଧମକ ଚମକ ଦେବା ସହ ଗାଳିଗୁଲଜ କରି ଦୁର୍ବ୍ୟବହାର କରିଥିଲେ ।
ଏହାର ଦୃଢ ପ୍ରତିବାଦ କରି ବ୍ଲକ କର୍ମଚାରୀ ମାନେ କଲମଛାଡ଼ ଆନ୍ଦୋଳନ କରିଥିଲେ । ତେବେ ,ଗତ କିଛିଦିନ ପୂର୍ବରୁ ବ୍ଲକ ଅଧ୍ୟକ୍ଷାଙ୍କ ମନୋମୁଖୀ କାର୍ଯ୍ୟକୁ ନେଇ ତାଙ୍କ ବିରୁଦ୍ଧରେ ଆସିଥିବା ଏକ ଅନାସ୍ଥା ପ୍ରସ୍ତାବକୁ କେନ୍ଦ୍ରକରି ପୁଣିଥରେ ଅଧ୍ୟକ୍ଷା ଓ ବିଡ଼ିଓଙ୍କ ମଧ୍ୟରେ ବିବାଦୀୟ ପରିସ୍ଥିତି ସୃଷ୍ଟି ହୋଇଛି ।