କଟକରେ ଚାଞ୍ଚଲ୍ୟ: ବଡଭାଇ ପରିବାରକୁ ନିପାତ କରିଦେଲା ସାନଭାଇ

ବଡଭାଇ ପରିବାରର 5 ଜଣ ସଦସ୍ୟଙ୍କୁ ହତ୍ୟା କଲା ସାନଭାଇ । ଥାନାରେ କଲା ଆତ୍ମସମର୍ପଣ । ଅଧିକ ପଢନ୍ତୁ

କଟକ: କୁସୁପୁର ପଞ୍ଚାୟତ କୁସୁପୁର ଗ୍ରାମରେ ଚାଞ୍ଚଲ୍ୟ । ଗୋଟିଏ ପରିବାରର ୫ ଜଣଙ୍କୁ ଅତି ନିର୍ମମ ଭାବେ ହତ୍ୟା କଲା ସାନଭାଇ । ଗତକାଲି(ସୋମବାର) ରାତିରେ ହତ୍ୟା କରିବା ପରେ ଥାନାରେ ଆତ୍ମ ସମର୍ପଣ କରିଛି ଅଭିଯୁକ୍ତ ସାନଭାଇ ଶିବ ସାହୁ । ହତ୍ୟାର କାରଣ ଅସ୍ପଷ୍ଟ । ତଦନ୍ତ ଆରମ୍ଭ କରିଛି ପୋଲିସ ।

ସୂଚନା ଅନୁଯାୟୀ, ସୋମବାର ବିଳମ୍ବିତ ରାତିଲେ ଶିବ ସାହୁ ବଡ ଭାଇ ଅଲେଖ ସାହୁଙ୍କ ସମେତ ତାଙ୍କ ପତ୍ନୀ, ଦୁଇ ପୁଅ ଏବଂ ଝିଅକୁ ହତ୍ୟା କରିବେ ପରେ ଘରେ ବନ୍ଦି କରି ପଳାଇଥିଲା । ଆଜି(ମଙ୍ଗଳବାର) ଥାନାରେ ଆତ୍ମସମର୍ପଣ କରିଛି ଶିବ । ପୋଲିସ ଘଟଣାସ୍ଥଳରେ ପହଞ୍ଚି ଘରର ତାଲା ଭାଙ୍ଗି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ହତ୍ୟାକାଣ୍ଡର ପ୍ରକୃତ କାରଣ ସ୍ପଷ୍ଟ ହୋଇନଥିଲେ ମଧ୍ୟ ଜମିବାଡି ବିବାଦକୁ ନେଇ ଏପରି ଜଘନ୍ୟ କାଣ୍ଡ ହୋଇଥାଇ ପାରେ ବୋଲି ପ୍ରାଥମିକ ତଦନ୍ତରୁ ସନ୍ଦେହ କରୁଛି ପୋଲିସ ।

ଅନ୍ୟପଟେ ଥାନାରେ ଆତ୍ମସମର୍ପଣ ପୂର୍ବରୁ ଏକ ଭିଡିଓ ଜାରି କରିଛନ୍ତି ଅଭିଯୁକ୍ତ ଶିବ ସାହୁ । ଶିବଙ୍କ କହିଛନ୍ତି ଯେ, 'ପାରିବାରିକ କଳହ କାରଣରୁ ବଡଭାଇ ସହ ତିକ୍ତତା ଲାଗି ରହୁଥିଲା । ସେମାନେ ମୋତେ ହଇରାଣ କରୁଥିଲେ । ଗତକାଲି ରାତିରେ ଭାଇ-ଭାଉଜ ଏବଂ ତାଙ୍କ ପିଲାମାନେ ଏକାଠି ହୋଇ ମୋତେ ମାରିଲେ । ମୁଁ ମୋ ମାନସିକ ସ୍ଥିତି ହରାଇ ବସିଲି ।' ଫଳରେ ରାଗିଯାଇ ସେମାନଙ୍କୁ ହତ୍ୟା କରିଥିବା ଭିଡିଓ ଜରିଆରେ କହିଛନ୍ତି ଅଭିଯୁକ୍ତ ସାନଭାଇ । ତେବେ ପ୍ରକୃତରେ କେଉଁ କାଣରୁ ଏପରି ଏକ ଜଘନ୍ୟ ହତ୍ୟାକାଣ୍ଡ ଘଟିଛି ପୋଲିସର ତଦନ୍ତ ପରେ ସ୍ପଷ୍ଟ ହେବ ।

କଟକରୁ ନାରାୟଣ ସାହୁ, ଇଟିଭି ଭାରତ