କଟକ: ଦୃଢ଼ ଇଚ୍ଛାଶକ୍ତି ଆଗରେ ଫିକା ପଡିଯାଏ ସବୁ କିଛି । ଲକ୍ଷ୍ୟ ସାଧନା ଦିଗରେ ଶରୀର ଅପେକ୍ଷା ମନ ବଳର ଆବଶ୍ୟତକା ଅଧିକ । ଏପରି ଜଣେ ବ୍ୟକ୍ତିତ୍ବ ହେଲେ ହ୍ବିଲ୍ ଚେୟାରକୁ ସାଥୀ କରିଥିବା କଟକ ଦେଉଳସାହି ଅଞ୍ଚଳର ଦିବ୍ୟାଙ୍ଗ ମନୋଜ ସ୍ବାଇଁ । ଜଣେ ଦିବ୍ୟାଙ୍ଗ ହୋଇ ସେ ଏକ ଟ୍ରାଭେଲ ଏଜେନ୍ସି ଚଳାଉଛନ୍ତି । ଆଉ ନିଜର ଦୃଢ଼ ପ୍ରତିଜ୍ଞା ବଳରେ ସଫଳତାର ସହ ଏ ଦିଗରେ ଅଗ୍ରସର ହୋଇ ଚାଲିଛନ୍ତି । କେବଳ ଏତିକି ନୁହେଁ ନିଜକୁ ସ୍ବାବଲମ୍ବୀ କରିବା ସହ ଆଉ 30 ଜଣ ବେକାରୀଙ୍କୁ ଦେଇଛନ୍ତି ନିଯୁକ୍ତି । ଆଉ ସମାଜ ପାଇଁ ପାଲଟିଛନ୍ତି ପ୍ରେରଣାର ଉତ୍ସ ।
2011 ମସିହାରେ ଏକ ବଡ ଦୁର୍ଘଟଣାରେ ମନୋଜଙ୍କ ଶରୀରର ଅଧା ଅଙ୍ଗ ଅକାମୀ ହୋଇଯାଇଥିଲା । ଏହା ପରେ ମା' ସୁମିତ୍ରା ସ୍ବାଇଁଙ୍କ କ୍ୟାନସର ଜନିତ ମୃତ୍ୟୁ ତାଙ୍କ ଜୀବନରେ ଆଣି ଦେଇଥିଲା ଆଉ ଏକ ଅପୂରଣୀୟ ଯନ୍ତ୍ରଣା । ହେଲେ ଏମିତି ସ୍ଥିତିରେ ସେ ଭାଙ୍ଗି ନଯାଇ ଦୃଢତାର ସହ ନିଜ ପାରିବାରିକ ଜୀବନ ଏବଂ କର୍ମମୟ ଜୀବନ ଉଭୟର ଦାୟିତ୍ବ ବେଶ ଭଲ ଭାବରେ ତୁଲାଉଥିଲେ । ଯାହାର ପରିଣାମ ସ୍ବରୂପ ତାଙ୍କ ପରିବାର ଆଜି ବେଶ ଖୁସିରେ ଜୀବନ ବିତାଉଛି ବୋଲି କହିଛନ୍ତି ମନୋଜଙ୍କ ବାପା ।