କଟକ: ଓଡ଼ିଆ ପାଳୁଛନ୍ତି ବିଶ୍ୱ ପଖାଳ ଦିବସ । ସଂସ୍କୃତି ଓ ପରମ୍ପରା ନଗରୀ କଟକରେ ଥିବା ବଡ଼ ବଡ଼ ହୋଟେଲ ଗୁଡିକରେ ପଖାଳ ଦିବସ ପାଇଁ ସ୍ୱତନ୍ତ୍ର ପ୍ରସ୍ତୁତି କରାଯାଇଥିଲା । ଓଡ଼ିଆ ଘରର ଏହି ପାରମ୍ପରିକ ଖାଦ୍ୟର ଚାହିଦା ବିଶେଷ କରି ଖରାଦିନେ ଢେର ଅଧିକ ରହିଥିବାରୁ ଦହି ପଖାଳ ସହ ଅନ୍ୟାନ୍ୟ ପାରମ୍ପରିକ ଖାଦ୍ୟକୁ ପରସିବାର ସ୍ୱତନ୍ତ୍ର ବନ୍ଦୋବସ୍ତ କରାଯାଇଛି । ଆଜିର ଦିନରେ ସୁସ୍ବାଦୁ ପଖାଳର ମଜା ନେଇ ଗ୍ରାହକ ଢେର ଖୁସି ପ୍ରକାଶ କରିଛନ୍ତି । ଗ୍ରାହକଙ୍କ ପାଇଁ ବିଭିନ୍ନ ହୋଟେଲ ଗୁଡିକରେ ଭଳିକି ଭଳି ବ୍ୟଞ୍ଜନ ପ୍ରସ୍ତୁତ କରାଯାଇଛି ।
ଏହା ମଧ୍ୟ ପଢ଼ନ୍ତୁ:ବିଶ୍ୱ ପଖାଳ ଦିବସ: ପ୍ରଭୁ ଜଗନ୍ନାଥଙ୍କ ନିକଟରେ ଲାଗିହୁଏ ବିଭିନ୍ନ ରକମର ପଖାଳ
ଦହି, ପୋଦିନା ପତ୍ର, ଭୃସଙ୍ଗ ପତ୍ର, ଅଦା, ଲଙ୍କା ଆଦିକୁ ଛୁଙ୍କ ଦେଇ ପ୍ରସ୍ତୁତ କରାଯାଇଛି ଦହି ପଖାଳ । ଆଉ ତା ସାଙ୍ଗକୁ ପ୍ଲେଟରେ ସ୍ୱତନ୍ତ୍ର ଭାବେ ପରସା ଯାଇଛି ଓଡ଼ିଶାର ଘରେ ଘରେ ପରିଚିତ ପାରମ୍ପରିକ ଖାଦ୍ୟ । ଯେମିତିକି ବଢିଚୁରା, ଆଳୁ ଭରତା, ଛୁଇଁ ଆଳୁଭଜା, ଶାଗଭଜା, ବାଇଗଣ ଚଟୁଣୀ, କଲରା ଚିପ୍ସ, ବିଲାତି ଚଟଣୀ, ପାମ୍ପଡ଼, ମାଛ ଭଜା ଭଳି ଅନେକ ସୁସ୍ବାଦୁ ଖାଦ୍ୟ ପାରସା ଯାଇଛି । ଆମିଷ ପ୍ରୀୟ ଲୋକଙ୍କ ପାଇଁ ମାଛ ଭଜା, ମସଲା ମାଛ, ଚିଙ୍ଗୁଡି କଷା, ଚୁନା ମାଛ ରାଇ ଭଳି ନାନାଦି ପ୍ରକାରର ବ୍ୟଞ୍ଜନ ପ୍ରସ୍ତୁତ କରାଯାଇଥିଲା ।