ରାଜ୍ୟଗୋଷ୍ଠୀ ଟେବୁଲଟେନିସ ପ୍ରତିଯୋଗିତା: ଭାରତର ବିଜୟ ଧାରା ଜାରି

ରାଜ୍ୟଗୋଷ୍ଠୀ ଟେବୁଲ ଟେନିସ ପ୍ରତିଯୋଗୀତାର ଦ୍ୱିତୀୟ ଦିନରେ ଭାରତର ବିଜୟ ଧାରା ଜାରି ରହିଛି । ବିପକ୍ଷ ଦଳକୁ ପରାଜିତ କରି ଉଭୟ ମହିଳା ଓ ପୁରୁଷ ଦଳ ଫାଇନାଲରେ ସ୍ୱର୍ଣ୍ଣ ଆଶାକୁ ଆହୁରି ପକ୍କା କରିଛନ୍ତି ।

କଟକ: ଜବାହାରଲାଲ ନେହରୁ ଇଣ୍ଡୋର ଷ୍ଟାଡିଅମରେ ଜାରି ରହିଛି 21ତମ ରାଜ୍ୟଗୋଷ୍ଠୀ ଟେବୁଲଟେନିସ ପ୍ରତିଯୋଗିତା । ସମୁଦାୟ 12ଟି ଦଳ ଏହି ମେଗା ଇଭେଣ୍ଟରେ ଭାଗ ନେଇଛନ୍ତି । କିନ୍ତୁ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଭାରତୀୟ ଦଳ ଉଭୟ ପୁରୁଷ ଓ ମହିଳା ବର୍ଗରେ ଚମତ୍କାର ପ୍ରଦର୍ଶନ ଜାରି ରଖିଛି । ଗ୍ରୁପ ପର୍ଯ୍ୟାୟରେ ନିଜର ପତିଆରା ଜାହିର କରିଛି ଭାରତ।

ଦ୍ୱିତୀୟ ଦିନରେ ପହଁଞ୍ଚିଛି ଟେବୁଲ ଟେନିସର ଲିଗ ପର୍ଯ୍ୟାୟ ମ୍ୟାଚ । ଯେଉଁଥିରେ ଟିମ ଇଣ୍ଡିଆ ବେଶ ପ୍ରଭାବଶାଳୀ ପ୍ରଦର୍ଶନ ଜାରିରଖିଛି। ଉଭୟ ମହିଳା ଓ ପୁରୁଷ ଦଳ ଗ୍ରୁପ ପର୍ଯ୍ୟାୟରେ ବିପକ୍ଷ ଦଳକୁ ମାତ ଦେଇଛନ୍ତି। ତେବେ ଏହି ମନୋବଳକୁ ନେଇ ଟିମ ଫାଇନାଲରେ ସ୍ଵର୍ଣ୍ଣ ପଦକ ବିଜେତା ହେବ ବୋଲି କହିଛନ୍ତି ଖେଳାଳି ।

ଅନ୍ୟପଟେ ଟିମର ସଫଲତାକୁ ନେଇ ବେଶ ଖୁସି ଅଛନ୍ତି କୋଚ ବ୍ରେଟ କ୍ଲାର୍କ । ଏହି ରାଜ୍ୟଗୋଷ୍ଠି କ୍ରୀଡ଼ାରେ ଇଂଲଣ୍ଡ, ନାଇଜେରିଆ, ମାଲେସିଆ ଭଳି ଶକ୍ତିଶାଳୀ ଟିମ ରହିଛନ୍ତି । କିନ୍ତୁ ସେହି ସମସ୍ତ ଟିମଙ୍କ ମଧ୍ୟରେ ଭାରତ ସଭିଙ୍କ ଫେଭରାଇଟ ବୋଲି କହିଛନ୍ତି ଟିମର କୋଚ କ୍ଲାର୍କ । ଏହାସହ ଭାରତ ସମସ୍ତ ଟିମକୁ ମାତ ଦେବା ପାଇଁ ସମ୍ପୂର୍ଣ ପ୍ରସ୍ତୁତ ବୋଲି କହିଛନ୍ତି ସେ । ଏପର୍ଯ୍ୟନ୍ତ ଭାରତୀୟ ଟିମ ଯେଉଁଭଳି ପ୍ରଦର୍ଶନ କରିଛି ସେଥିରୁ ସ୍ପଷ୍ଟ ଜଣାପଢୁଛି ଯେ ଟିମ ଫାଇନାଲରେ ସ୍ଵର୍ଣ୍ଣ ଜିତିବା ନିଶ୍ଚିତ ।

କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ