ଚୌଦ୍ୱାରରେ ବିଜେଡି ରାଜନୀତି ତେଜ୍: ରୂପାଲିଙ୍କ ରାଲି ପ୍ରଭାବଶୂନ୍ୟ କହିଲେ ପ୍ରଭାତ ବିଶ୍ୱାଳ

Rally in Chowdwar: ଚୌଦ୍ୱାର ନିର୍ବାଚନ ମଣ୍ଡଳୀ ପାଇଁ ଆଶାୟୀଙ୍କ ସଂଖ୍ୟା ଅଧିକ ଥିବାବେଳେ ଜଣେ ଆଶାୟୀ ରାଲି କରିଥିବା ଦେଖିବାକୁ ମିଳିଛି । ଯାହାକୁ ନେଇ ପ୍ରତିକ୍ରିୟା ରଖିଛନ୍ତି ପୂର୍ବତନ ବିଧାୟକ ପ୍ରଭାତ ବିଶ୍ବାଳ। ଅଧିକ ପଢନ୍ତୁ

କଟକ: ଚୌଦ୍ୱାର ନିର୍ବାଚନ ମଣ୍ଡଳୀରେ ବିଜେଡି ଟିକେଟ୍ ପାଇଁ ଲମ୍ବା ରେସ୍ । ଅନେକ ଆଶାୟୀଙ୍କ ମଧ୍ୟରୁ ଜଣେ ହେଉଛନ୍ତି ରୂପାଲି ଲେଙ୍କା । ଯିଏକି ଗତକାଲି (ବୁଧବାର) କରିଛନ୍ତି ଶକ୍ତି ପ୍ରଦର୍ଶନ । ଏହି ପରିପ୍ରେକ୍ଷୀରେ ପୂର୍ବତନ ବିଧାୟକ ପ୍ରଭାତ ବିଶ୍ୱାଳ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, "ଯେଉଁ ରାଲି ଗତକାଲି ହୋଇଛି ତାହା ପ୍ରଭାବଶୂନ୍ୟ। ବିଜେଡିକୁ ଚୌଦ୍ୱାର ନିର୍ବାଚନ ମଣ୍ଡଳୀର ତୃଣମୂଳ ସ୍ତରରୁ ମଜବୁତ କରିବାରେ କିଏ ସହାୟକ ହୋଇଛି ତାହା ଲୋକେ ଜାଣିଛନ୍ତି । ନିର୍ବାଚନ ଆସିଲେ ଅନେକ ଆଶାୟୀ ଆସନ୍ତି।"

ଦଳର ସୁପ୍ରିମୋଙ୍କ କଥାରେ ହିଁ ଏଠାରେ ସବୁ କିଛି ହୋଇଥଏ ବୋଲି କହିଛନ୍ତି ପୂର୍ବତନ ବିଧାୟକ ପ୍ରଭାତ ବିଶ୍ବାଳ। "ନିର୍ବାଚନ ଆଉ କମ୍ ଦିନ ରହିଛି ତେଣୁ କିଏ ନବୀନ ବାବୁ ଓ ପାଣ୍ଡିଆନଙ୍କ ଫଟୋ ଲଗାଇ ଓ ବିଜେଡି ପତାକା ଧରି ରାଲି କରିବ ତାହା ତାର ବ୍ୟକ୍ତିଗତ ବିଚାର। କିନ୍ତୁ ଏହା କେବଳ ନିର୍ବାଚନ ପୂର୍ବରୁ , ଯେବେ ନିର୍ବାଚନ ଫଳାଫଳ ଆସେ ସେଠାରେ କିଏ ବାଜି ମାରିବ ତାହା ପୂର୍ବରୁ ରେକର୍ଡ ରହିଛି । ତେଣୁ ଲୋକମାନଙ୍କ ସହ ବିଜେଡି ରହିଛି ଆଉ ରହିବ" ବୋଲି କହିଛନ୍ତି ପ୍ରଭାତ ବିଶ୍ବାଳ। ଏହାରି ଭିତରେ ଚୌଦ୍ୱାର ନିର୍ବାଚନ ମଣ୍ଡଳୀର ହେବିୱେଟ୍ କୁହାଯାଉଥିବା ପ୍ରଭାତ ବିଶ୍ୱାଳଙ୍କ ପୁଅ ସୌଭିକ ବିଶ୍ୱାଳ ମଧ୍ୟ ରେସର ଆଗରେ ରହିଛନ୍ତି। ଏହି ଛକାପଞ୍ଝା ଭିତରେ ବାଜି କିଏ ମାରିବ ତାକୁ ନେଇ ପ୍ରଶ୍ନ ଉଠିଛି ।

ସୂଚନା ଅନୁସାରେ, ଗତ ନିର୍ବାଚନରେ ବିଜେଡି ଟିକେଟରୁ ଆଶାୟୀ ଥିବା ରୂପାଲି ଲେଙ୍କା ଗତକାଲି ସମର୍ଥକଙ୍କୁ ସାଙ୍ଗରେ ନେଇ ପଦଯାତ୍ରା କରି ନିଜର ଶକ୍ତି ପ୍ରଦର୍ଶନ କରିଥିଲେ। ମାଲଗୋଦାମ ଥାନା ନିକଟରେ ଥିବା ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରି ନିଜର ସମର୍ଥକଙ୍କ ସହ ବିଜେଡି ପତାକା ଧରି ଶୋଭାଯାତ୍ରା କରିଥିଲେ । ଏହାସହ ସେ ନବୀନ ପଟ୍ଟନାୟକ ଓ ଭିକେ ପାଣ୍ଡିଆନଙ୍କ ଫଟୋ ଥିବା ବ୍ୟାନର ଧରିଥିବା ମଧ୍ୟ ଦେଖିବାକୁ ମିଳିଥିଲା । କଟକ ଚୌଦ୍ୱାର ନିର୍ବାଚନ ମଣ୍ଡଳୀରେ ପଦଯାତ୍ରା କରିଥିଲେ ରୂପାଲି । ତାଙ୍କ ମତରେ, "ଆଗାମୀ ନିର୍ବାଚନ ପାଇଁ ମୁଁ ଲଢ଼ିବା ପାଇଁ ପ୍ରସ୍ତୁତ ଅଛି । ଆଶା ଅଛି ବିଜେଡି ଟିକେଟରୁ ଲଢ଼ିବି । ଯଦି ବିଜେଡି ଟିକେଟ୍ ନ ଦିଏ ତେବେ ସ୍ୱାଧୀନ ଭାବେ ଲଢ଼ିବି । ଲୋକଙ୍କ ସମର୍ଥନ ଅଛି, ଲୋକଙ୍କ ସେବା କରିବା ପାଇଁ ଲଢ଼ିବି ।"

ଇଟିଭି ଭାରତ, କଟକ