କଟକ: କୋରୋନା ଯୋଗୁଁ ଚାରିଆଡେ ଲକଡାଉନ । ଏହି ସମୟରେ ପୋଲିସ ଦେଖାଉଛି ମହାନତା । କର୍ତ୍ତବ୍ୟ ନିଷ୍ଠା ସହ ବଦାନ୍ୟତା ଗୁଣରେ ବି ବେଶ ଆଗରେ କମିଶନରେଟ ପୋଲିସ । ଯାହାକୁ ନେଇ ଏବେ ରାଜ୍ୟ ତମାମ ଚର୍ଚ୍ଚା । କାରଣ ଲକଡାଉନ ସମୟରେ ନିଜ ଜୀବନକୁ ଭୁଲି ଅନ୍ୟ ମାନଙ୍କ ମୁଁହରେ ହସ ଫୁଟାଇବା ପାଇଁ ଲାଗିପଡିଛନ୍ତି ପୋଲିସ କର୍ମଚାରୀ ।
ମହିଳା ସବ-ଇନିସପେକ୍ଟରଙ୍କ ମହାନୀୟତା, ମହିଳାଙ୍କୁ ନିଜ ହାତରେ ଖୁଆଲେ ଭାତ
ତେବେ ଏହାରି ଭିତରେ ସିଲଭରିସିଟିରେ ଏମିତି ଏକ ଦୃଶ୍ୟ ସାମ୍ନାକୁ ଆସିଛି ଯାହା ବେଶ ହୃଦୟସ୍ପର୍ଶୀ । ଗୋଟିଏ ଭୋକିଲା ମାଆ ପେଟକୁ ନିଜ ହାତରେ ଜଣେ ପୋଲିସ କର୍ମଚାରୀ ଖୁଆଇ ଦେବା ଦୃଶ୍ୟ । ଯାହାକୁ ଦେଖିଲେ ଆଖିରେ ଲୁହ ଆସିବା ସ୍ବାଭାବିକ । ନିଜ ଝିଅ ପରି ମାଆଙ୍କୁ ଖୁଆଇ ଦେଉଛନ୍ତି ଏହି ମହିଳା ପୋଲିସ। ସେ ମହିଳା କର୍ମଚାରୀ ଜଣଙ୍କ କଟକ ମହିଳା ଥାନାରେ ସବଇନିସପେକ୍ଟର ଭାବରେ କାର୍ଯ୍ୟ କରନ୍ତି । ନାଁ ତାଙ୍କର ବର୍ଷା ମହାନ୍ତି । ଜଣେ ମାନସିକ ବିକାରଗ୍ରସ୍ତ ମହିଳାଙ୍କୁ ନିଜ ହାତରେ ଖୁଆଇ ନିଜର ଉଦରତା ଭାବକୁ ସ୍ବତନ୍ତ୍ର ପରିଚୟ ଦେଉଛନ୍ତି ସେ ।