କଟକ: ଆଜି (ବୁଧବାର) ହେଉଛି ପବିତ୍ର ଇଦ୍ । ମଙ୍ଗଳବାର ଚାନ୍ଦ ଦେଖିବାପରେ ବୁଧବାର ଇଦ୍ ପାଳିଛନ୍ତି ମୁସଲମାନ ଶ୍ରଦ୍ଧାଳୁମାନେ । ସମୂହ ନମାଜ ପାଠ ପରେ ପରସ୍ପରକୁ ଆଲିଙ୍ଗନ କରି ଖୁବ୍ ଆନନ୍ଦ ଉଲ୍ଲାସର ସହ ଏହି ପର୍ବକୁ ପାଳନ କରିଛନ୍ତି । ଭାଇଚାରାର ସହର କଟକରେ ଧୁମ୍ଧାମରେ ପାଳିତ ହୋଇଛି ଏହି ପର୍ବ ।
ଇଦ୍ ଅବସରରେ ସହରର ଥିବା ସମସ୍ତ ମସଜିଦରେ ନମାଜ ପାଠ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଥିଲା । ମସଜିଦଗୁଡିକରେ ପ୍ରବଳ ଭିଡ଼ ଦେଖିବାକୁ ମିଳିଥିଲା । କଦମରସୁଲ ଠାରେ ଥିବା ମସଜିଦରେ ୨ଟି ପର୍ଯ୍ୟାୟରେ ସମୂହ ନମାଜ ପାଠ କରାଯାଇଥିଲା । କଟକର ସର୍ବପୂରାତନ ଇଦଘା ଠାରେ ଶେଷ ନମାଜ ପାଠ କରାଯାଇଥିଲା । ଭିନ୍ନ ଧର୍ମର ଲୋକ ମଧ୍ୟ ଏହି ପର୍ବକୁ ଭାଇଚାରାର ନିଦର୍ଶନ ରୂପେ ପାଳନ କରିଛନ୍ତି । ଏହି କ୍ରମରେ ଅଭିନେତା ଅରିନ୍ଦମ ରାୟ ମସଜିଦ ଯାଇ ପର୍ବରେ ସାମିଲ ହୋଇଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ