କଟକ: ପାଠ ପଢିବାକୁ ଅନେକ ଇଛା । ମନରେ ଅସୁମାରୀ ସ୍ବପ୍ନ । କିନ୍ତୁ ଭାଗ୍ୟ ସାଜିଛି କାଳ । ଜନ୍ମରୁ ପାଟି ଓ କାନ ଅଚଳ ହୋଇପଡିଛି ମୌସୁମୀଙ୍କର । ଯାହାକୁ ନେଇ ପଢିବା କ୍ଷେତ୍ରରେ ହେଉଛି ଅନେକ ଅସୁବିଧା । ଏହି ଅସୁବିଧା ଉପରେ ପୂର୍ଣ୍ଣଚ୍ଛେଦ ପକାଇବା ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଗୁହାରି କରିଥିଲେ ମୌସୁମୀ । କିନ୍ତୁ ଏଯାବତ ପଦକ୍ଷେପ ଶୂନ । ଗୁହାରିକୁ 3 ବର୍ଷ ପୁରିଥିଲେ ବି ଆଜି ବି ସମାନ ଅବସ୍ଥା ମୌସୁମୀଙ୍କର । ନା ଅଛି ଆର୍ଥିକ ପ୍ରୋତ୍ସାହନ ନା ଅଛି ଡ଼ାକ୍ତରୀ ସହାୟତା । ଯାହାକୁ ନେଇ ଅତିଷ୍ଠ ହୋଇପଡିଛନ୍ତି ପରିବାର ଲୋକେ । ଯଦି କିଛି ସହାୟତା ନମିଳେ ତେବେ ମୃତ୍ୟୁ ହିଁ ଶେଷ ବାଟ ବୋଲି କହିଛନ୍ତି ମା ସଂଯୁକ୍ତା ସ୍ୱାଇଁ ।
କଟକ ଶିଖରପୁରର ଝିଅ ମୌସୁମୀ ସ୍ବାଇଁ । ପାଠ ପଢି ବଡ଼ ମଣିଷ ହେବାର ଆଶା । କିନ୍ତୁ ଅଚଳ କାନ ଓ ପାଟି ଯୋଗୁ ସବୁ ଆଶା ମଉଳି ଧୂଳିସାତ । ସତରେ କଣ ମୁଁ କେବେ ଭଲରେ କଥା ହୋଇପାରିବି । ନା ଠିକ ସେ ଶୁଣି ପାରିବି । ଯାହାକୁ ନେଇ ସମ୍ପୂର୍ଣ୍ଣ ରୂପେ ଭାଙ୍ଗିପଡିଛନ୍ତି ମୌସୁମୀ । ଏହାକୁ ଦେଖି ମଧ୍ୟ କୋହରେ ଛଟପଟ ହେଉଛନ୍ତି ମା ସଂଯୁକ୍ତା । ନା ଅଛି ଶାହା କି ଭରସା । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦେଇଥିବା ନିର୍ଭୟ ପ୍ରତିଶ୍ରୁତିକୁ ଅପେକ୍ଷା କରି ଦୁଃଖରେ ଦିନ କାଟୁଛନ୍ତି ମୌସୁମୀର ପରିବାର ଲୋକେ ।