କଟକ:ଆଜାଦିର ଅମୃତ ମହୋତ୍ସବ ଓ ନେତାଜୀଙ୍କ ୧୨୬ତମ ଜୟନ୍ତୀ ଉପଲକ୍ଷେ ସିଆରପିଏଫ ଏବଂ ଆଇଟିବିପି ପକ୍ଷରୁ ଓଡିଶା ସରକାରଙ୍କ ସହଯୋଗରେ ଐତିହ୍ୟ ନଗରୀ କଟକରେ ବିଭିନ୍ନ କାର୍ଯ୍ୟକ୍ରମ ଆୟୋଜିତ ହୋଇଛି । କଟକ ସହରରେ ନେତାଜୀ ସୁଭାଷ ଚନ୍ଦ୍ର ବୋଷ ଜନ୍ମ ଗ୍ରହଣ କରିବା ସହିତ ନିଜର ଶୈଶବ ସମୟ ଅତିବାହିତ କରିଥିଲେ ।
ଆଜି ସକାଳେ ନେତାଜୀଙ୍କ ଜନ୍ମସ୍ଥାନ ଓଡ଼ିଆ ବଜାରରୁ ଏକ ବିରାଟ ରାଲି ବାହାରି କିମ୍ବଦନ୍ତୀ ପୁରୁଷ ବିଜୁ ପଟ୍ଟନାୟକଙ୍କ ଜନ୍ମସ୍ଥାନ ତୁଳସୀପୁରସ୍ଥିତ ଆନନ୍ଦଭବନକୁ ଯାଇଥିଲା । ଏଥିରେ ସିଆରପିଏଫ, ଆଇଟିବିପି, ଓଡ଼ିଶା ପୋଲିସର ସଦସ୍ୟଗଣ ଛାତ୍ରଛାତ୍ରୀ, ଓ ଜନସାଧାରଣ ବହୁ ସଂଖ୍ୟାରେ ଯୋଗ ଦେଇଥିଲେ । ଏହି ଅବସରରେ ଏକ ସାଇକେଲ ରାଲି ମଧ୍ୟ ଆୟୋଜିତ ହୋଇଥିଲା । କଟକ ମହାନଗର ନିଗମ ମେୟର ସୁବାଷ ଚନ୍ଦ୍ର ସିଂହ ଏହାକୁ ଉଦଘାଟନ କରିଥିଲେ । ଏହି କାର୍ଯ୍ୟକ୍ରମରେ କଟକ ଜିଲ୍ଲାପାଳ ଭବାନୀଶଙ୍କର ଚୟନୀ, ସିଆରପିଏଫ ଓ ଆଇଟିବିପିର ଅଧିକାରୀଗଣ ଉପସ୍ଥିତ ଥିଲେ ।
ଷ୍ଟିୱାର୍ଟ ସାଇନ୍ସ କଲେଜ ପରିସରରେ ଏହି ଅବସରରେ ଏକ ରକ୍ତଦାନ ଶିବିର ଆୟୋଜିତ ହୋଇଥିଲା । ଏହାଛଡା ନେତାଜୀ ପାଠ ପଢିଥିବା ରେଭେନ୍ସା କଲେଜିଏଟ ସ୍କୁଲ ପରିସରରେ ବୃକ୍ଷରୋପଣ ମଧ୍ୟ କରାଯାଇଥିଲା । ନେତାଜୀଙ୍କ ବୀରତ୍ୱ ଓ ଆଜାଦ ହିନ୍ଦ ଫୌଜର ସାହାସକୁ ସ୍ମରଣ କରିବା ପାଇଁ ସହିଦଭବନରେ ବିଭିନ୍ନ ପ୍ରକାର ଅସ୍ତ୍ରଶସ୍ତ୍ର ମଧ୍ୟ ପ୍ରଦର୍ଶିତ ହୋଇଥିଲା । ଏହି ସବୁ ଅସ୍ତ୍ରଶସ୍ତ୍ର ମଧ୍ୟରେ ଥିଲା ସିଜିଆରଏଲ, ଅଟୋମେଟିକ ଗ୍ରେଜେଡ ଲଞ୍ଚର, ୮୧ ଏମଏମ ମୋର୍ଟସ, ୭.୬୨ଏମମ ଏମଏମଜି, ୭.୬୨ଏମଏମ ସ୍ନାଇପର, ଘାତକ ରାଇଫଲ, ଓୟାରଲେସ କମ୍ୟୁନିକେସନ ସିଷ୍ଟମ ଆଦି ଅନ୍ତର୍ଭୁକ୍ତ ।