କଟକ: "ଏଥର ଋଷି ଭାଇ ଜିତିଲେ ମନ୍ତ୍ରୀ ମଣ୍ଡଳରେ ଶପଥ ନେବେ । ଆଉ ନିଶ୍ଚିତ ମନ୍ତ୍ରୀ ପଦ ପାଇବେ । ଏହି ବିଶ୍ବାସ ମୋର ଅଛି । ଦରକାର ପଡ଼ିଲେ ମୁଁ ମୁଖ୍ୟମନ୍ତ୍ରୀଙ୍କ ପାଖରେ ଜିଦି କରି ଋଷି ଭାଇଙ୍କୁ ମନ୍ତ୍ରୀ କରିବି । ଯାହାବି ହେଲେ ଋଷି ଭାଇ ଏଥର ମନ୍ତ୍ରୀ ହେବେ । ସେ ମନା କଲେ ବି ମନ୍ତ୍ରୀ ହେବେ ।" ରଜ ଉପଲକ୍ଷେ କଟକ ବିଜେଡି ଦ୍ବାରା ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଯୋଗଦେଇ ଏଭଳି ମନ୍ତବ୍ୟ ରଖିଛନ୍ତି ବିଜେଡି ସାଂସଦ ମୁନ୍ନା ଖାନ । ଏପରିକି ଏଥର ନିର୍ବାଚନରେ ଋଷି ଭାଇ (ଦେବାଶିଷ ସାମନ୍ତରାୟ)ଙ୍କୁ ଭୋଟ ଦେଇ ଜିତାଇବା ପାଇଁ ମଧ୍ୟ ସେ ଉପସ୍ଥିତ ଲୋକଙ୍କୁ ଅନୁରୋଧ କରିଛନ୍ତି । ତେବେ ମୁନ୍ନାଙ୍କ ମୁଖ୍ୟମନ୍ତ୍ରୀଙ୍କ ପାଖରେ ଜିଦି କରି ସେ ଦେବାଶିଷଙ୍କୁ ମନ୍ତ୍ରୀ କରାଇବା ବୟାନକୁ ନେଇ ଏବେ ସାଧାରଣରେ ବେଶ ଚର୍ଚ୍ଚା ହେଉଛି ।
ରଜ ପାଇଁ ଏକ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ କରିଥିଲା କଟକ ବିଜେଡି । ଆଉ ସେଥିରେ ଯୋଗ ଦେଇଥିଲେ କଟକ ସହରର ଅନେକ ରାଜନେତା, କର୍ପୋରେଟର, ବିଜେଡି ନେତା ଏବଂ ସ୍ଥାନୀୟ ବାସିନ୍ଦା । କଟକ ମହାନଗର ନିଗମର ୩ ନମ୍ବର ୱାର୍ଡ ତଥା ଧବଳେଶ୍ବର ଗଡାରେ ରଜ ଉପଲକ୍ଷେ ଆୟୋଜିତ ଏହି ବିଶେଷ କାର୍ଯ୍ୟକ୍ରମରେ ଅତିଥି ଭାବରେ ଯୋଗ ଦେଇ ସାଂସଦ ମୁନ୍ନା ଖାନ ଏପରି ପ୍ରତିକ୍ରିୟା ଦେଇଛନ୍ତି । ପୂର୍ବତନ ବିଧାୟକ ତଥା ଦେବାଶିଷ ସାମନ୍ତରାୟଙ୍କୁ ଏଥର ସମର୍ଥନ କରିବାକୁ ଏହି କାର୍ଯ୍ୟକ୍ରମରେ ଅନୁରୋଧ କରିଛନ୍ତି ମୁନ୍ନା । ଏହି ଅବସରରେ ଦେବାଶିଷ ସାମନ୍ତରାୟ (ଋଷି)ଙ୍କ ପାଇଁ କେବଳ ଯେ ଭୋଟ ଭିକ୍ଷା କରିଛନ୍ତି, ତାହା ନୁହେଁ, ବରଂ ଋଷିଙ୍କୁ ପ୍ରଶଂସାରେ ପୋତି ପକାଇଛନ୍ତି ମୁନ୍ନା । ସେ କହିଛନ୍ତି, "ଋଷି ଭାଇ ସବୁବେଳେ ମନା କରନ୍ତି ମନ୍ତ୍ରୀ ହେବାକୁ । ଏଥର ଆଉ ଛଡାଛଡି ନାହିଁ । ଏଥର ହେବାର ଅଛି ମାନେ ହେବାର ଅଛି । ଯାହା ହେବ ଦେଖାଯିବ । ନିଶ୍ଚିତ ଭାବରେ ଏଥର ଋଷି ଭାଇ ମନ୍ତ୍ରୀ ହେବେ । ଆପଣ ମାନଙ୍କ ସହଯୋଗ, ଶୁଭେଚ୍ଛା ଆଉ ଆଶୀର୍ବାଦ ଦରକାର । ବିଶେଷକରି ମାଆ ଭଉଣୀ ମାନଙ୍କ ଶୁଭେଚ୍ଛା ଋଷି ଭାଇଙ୍କ ଉପରେ ଥାଉ । ଆଶା କରିବି କଟକ ଏକ ଭାଇଚାରା ସହରରେ ସମସ୍ତେ ଭାଇଚାରା ଭାବରେ ଚାଲିବେ ଆଉ ସମସ୍ତେ ଋଷି ଭାଇ ପ୍ରତି ଆଶୀର୍ବାଦ କରିବେ ।"