ନିଆଳି:ମେଡିକାଲ ବେଡରେ ମୃତ୍ଯୁ ସହ ସଂଗ୍ରାମ କରୁଛନ୍ତି ଯୁବକ । ଏକ ସଡ଼କ ଦୁର୍ଘଟଣାରେ ଶରୀରର ୮୦ ଭାଗ ଆଘାତ ଲାଗିଥିବାବେଳେ ଗୁରୁତର ଅଛନ୍ତି ଦେବାଶିଷ ନାୟକ। ଚିକିତ୍ସା ପାଇଁ ବହୁ ଅର୍ଥର ଆବଶ୍ୟକ ଥିବାବେଳେ ଏଥି ପାଇଁ ପରିବାର ଏବଂ ଗ୍ରାମବାସୀ ସରକାରୀ ଏବଂ ବେସରକାରୀ ସହାୟତା ପାଇଁ ନିବେଦନ କରିଛନ୍ତି । ଦେବାଶିଷ ନାୟକ ମେଡିକାଲ ବେଡରେ ମୃତ୍ୟୁ ସହ ସଂଗ୍ରାମ କରୁଥିବାବେଳେ ପରିବାରକୁ ଘାରିଛି ପୁଅର ଚିକିତ୍ସା ଚିନ୍ତା ।
ସୂଚନା ଅନୁସାରେ, କଟକ ଜିଲ୍ଲା ନିଆଳି ଥାନା ମାଧବ ପଞ୍ଚାୟତସ୍ଥିତ ତାମ୍ପଦା ରଘୁନାଥପୁର ଗାଁର ସୁକାନ୍ତ ନାୟକଙ୍କ ଏକମାତ୍ର ପୁଅ ହେଉଛନ୍ତି ଦେବାଶିଷ । ଦେବାଶିଷ ଗତ ୨୫ ତାରିଖ ଦିନ ଗାଈ ଦାନା ପାଇଁ ଯାଇଥିବାବେଳେ ମାଧବ ଓ ତାମ୍ପଦା ରାସ୍ତାରେ ସଡକ ଦୁର୍ଘଟଣାର ସମ୍ମୁଖୀନ ହୋଇଥିଲେ । ତାଙ୍କ ମୁହଁ, ଗୋଡ, ହାତ ଓ ମେରୁଦଣ୍ଡ ଭାଙ୍ଗିଯିବା ସହିତ ଗୁରୁତର ଅବସ୍ଥାରେ ପ୍ରଥମେ କଟକ ବଡ ମେଡିକାଲ ଓ ପରେ ଘରୋଇ ଡାକ୍ତରଖାନାରେ ଚିକିତ୍ସା ଚାଲିଛି । ସୁକାନ୍ତଙ୍କ ଆର୍ଥିକ ପରିସ୍ଥିତି ଭଲ ନଥିବା ଯୋଗୁଁ ସେ ଚିନ୍ତାରେ ଦିନ କାଟୁଛନ୍ତି । ସମ୍ପର୍କୀୟ ଓ ଗ୍ରାମବାସୀଙ୍କ ଠାରୁ ଯାହା କିଛି ସହାୟତା ମିଳିଥିଲା ସେତକ ବି ସରିଗଲାଣି । ଦେବାଶିଷ ଚିକିତ୍ସା ପାଇଁ ବହୁ ଅର୍ଥ ଆବଶ୍ୟକ ବୋଲି ପରିବାର ଲୋକେ କହିଛନ୍ତି ।
ଏନେଇ ଦେବାଶିଷଙ୍କ ବାପା ସୁକାନ୍ତ କହିଛନ୍ତି," ରାଜ୍ଯ ସରକାରଙ୍କ ସ୍ବାସ୍ଥ୍ୟ ବୀମା କାର୍ଡରେ ଯେତିକି ଅର୍ଥ ଅଛି ତାହା ସମୁଦ୍ରକୁ ଶଙ୍ଖେ । ଦେବାଶିଷଙ୍କ ଚିକିତ୍ସା ପାଇଁ ଗାଁର ଲୋକମାନେ ସୋସିଆଲ ମିଡ଼ିଆର ସାହାରା ମଧ୍ୟ ନେଇଛନ୍ତି । ସୁକାନ୍ତ ନାୟକ ଅତ୍ୟନ୍ତ ଗରିବ ଶ୍ରେଣୀର ହୋଇଥିବାରୁ ସେ ଏତେ ପରିମାଣର ଅର୍ଥ କେଉଁଠୁ ଆଣିବେ ତାକୁ ନେଇ ଚିନ୍ତାରେ ପଡିଯାଇଛନ୍ତି । "ଏଥିପାଇଁ ସରକାରୀ ଓ ବେସରକାରୀ ସ୍ତରରେ ଅଧିକ ସହାୟତା ମିଳିଲେ ଦେବାଶିଷଙ୍କ ଚିକିତ୍ସା ହେବା ସହିତ ଅପରେସନ ହୋଇପାରିବ" ବୋଲି କହିଛନ୍ତି ସ୍ଥାନୀୟ ଲୋକ ।
ଏହା ବି ପଢନ୍ତୁ...ମାନସିକ ରୋଗରେ ଆକ୍ରାନ୍ତ ପୁଅ, କାନ୍ଦି କାନ୍ଦି ସହାୟତା ମାଗୁଛି ମା'
ଦୁର୍ଘଟଣା ପରଠାରୁ ସୁକାନ୍ତ ଘରେ ଚୁଲି ଜଳୁ ନାହିଁ । ପରିବାର ଲୋକେ ଦେବାଶିଷଙ୍କ ଚିକିତ୍ସା ପାଇଁ ଚିନ୍ତାରେ ଅଛନ୍ତି। ଗ୍ରାମବାସୀଙ୍କ କହିବା କଥା, "ଦେବାଶିଷ ଯୁକ୍ତ ଦୁଇ କଳା ଛାତ୍ର ଭାବରେ ଉତ୍ତୀର୍ଣ୍ଣ ହୋଇଛନ୍ତି। ସେ ଜଣେ ମେଧାବୀ ଛାତ୍ର ଓ ମେଳାପି ପିଲା । ତାଙ୍କ ଚିକିତ୍ସା ପାଇଁ ସରକାରୀ ଏବଂ ବେସରକାରୀ ସ୍ତରରେ ସହାୟତା ମିଳିପାରିଲେ ତାଙ୍କ ଜୀବନ ବଞ୍ଚିଯାଇପାରନ୍ତା ।"