ବାର କାଉନସିଲ ଅଫ ଇଣ୍ଡିଆର କଡା ନୋଟିସ, ଆନ୍ଦୋଳନ ପ୍ରତ୍ୟାହାର କଲେ ଅନେକ ବାର

ବାର କାଉନସିଲ ଅଫ ଇଣ୍ଡିଆର କଡା ନୋଟିସ ପରେ ଆନ୍ଦୋଳନ ପ୍ରତ୍ୟାହୃତ କରିଛନ୍ତି ଅନେକ ବାର । ଏନେଇ ରାଜ୍ୟ ଆଇନଜୀବୀ ପରିଷଦଙ୍କୁ ଲିଖିତ ଆକାରରେ ଅବଗତ କରାଇଥିବା ରାଜ୍ୟ ଆଇନଜୀବୀ ପରିଷଦ ସଚିବ କହିଛନ୍ତି । ସେପଟେ ଏହାକୁ ଗ୍ରହଣ କରାଯିବ ନାହିଁ ବୋଲି କହିଛି ସମ୍ବଲପୁର ଜିଲ୍ଲା ଓକିଲ ସଂଘ । ଲାଇସେନ୍ସ ବାତିଲ ହେଲେ ମଧ୍ୟ ଜାରି ରହିବ ଆନ୍ଦୋଳନ ବୋଲି କହିଛି ସମ୍ବଲପୁର ଜିଲ୍ଲା ଓକିଲ ସଂଘ । ଅଧିକ ପଢନ୍ତୁ

କଟକ:ବାର କାଉନସିଲ ଅଫ ଇଣ୍ଡିଆ (Bar Council of India)ର କଡା ନୋଟିସ ପରେ ଆନ୍ଦୋଳନ ପ୍ରତ୍ୟାହାର କରିଛନ୍ତି ରାଜ୍ୟର ଅନେକ ବାର ଆସୋସିଏସନ । ଏନେଇ ସମ୍ବଲପୁର, ବଡମ୍ବା, ଟାଙ୍ଗି, ତାଳଚେର ଓ ପାଲହଡା ବାର ଆସୋସିଏସନକୁ ନୋଟିସ କରାଯାଇଥିଲା । ଏଥି ମଧ୍ୟରୁ ବଡମ୍ବା, ଟାଙ୍ଗି, ତାଳଚେର ଓ ପାଲହଡା ବାର ଆସୋସିଏସନ ପକ୍ଷରୁ ଆନ୍ଦୋଳନ ପ୍ରତ୍ୟାହୃତ କରିଛନ୍ତି । ଏନେଇ ରାଜ୍ୟ ଆଇନଜୀବୀ ପରିଷଦଙ୍କୁ ଲିଖିତ ଆକାରରେ ଅବଗତ କରାଇଥିବା ରାଜ୍ୟ ଆଇନଜୀବୀ ପରିଷଦ ସଚିବ କହିଛନ୍ତି । ବାର କାଉନସିଲ ଅଫ ଇଣ୍ଡିଆର ନୋଟିସ ଆସିବା ପରେ ଉକ୍ତ ବାର ଆସୋସିଏସନଙ୍କୁ ଆନ୍ଦୋଳନ ପ୍ରତ୍ୟାହାର କରିବାକୁ କହିଥିଲା ରାଜ୍ୟ ଆଇନଜୀବୀ ପରିଷଦ । ତେବେ ସେମାନେ ଆନ୍ଦୋଳନ ପ୍ରତ୍ୟାହୃତ କରିଛନ୍ତି ।

ରାଜ୍ୟରେ କାର୍ଯ୍ୟବନ୍ଦ ଆନ୍ଦୋଳନରେ ସାମିଲ ଥିବା ଜିଲ୍ଲା ଓକିଲ ସଂଘକୁ, ବାର ଆସୋସିଏସନ ଅଫ ଇଣ୍ଡିଆ ପକ୍ଷରୁ କଡା ନୋଟିସ ଦିଆଯାଇଥିଲା । ଆନ୍ଦୋଳନ ପ୍ରତ୍ୟାହାର କରି ତୁରନ୍ତ କାର୍ଯ୍ୟରେ ଯୋଗଦେବା ସହ କୋର୍ଟକାର୍ଯ୍ୟ ସ୍ବାଭାବିକ କରିବାକୁ ନିର୍ଦ୍ଦେଶ ରହିଛି । ବାର ଆସୋସିଏସନ ଅଫ ଇଣ୍ଡିଆ ଓଡି଼ଶା ଚେୟାରମ୍ୟାନଙ୍କ ଉଦ୍ଦେଶ୍ୟରେ ଏହି ନୋଟିସ ଆସିଛି । ନୋଟିସରେ ଏହା ଉଲ୍ଲେଖ ରହିଛି ଯେ, କୋର୍ଟ କାର୍ଯ୍ୟ ଗୁରୁତର ଭାବେ ପ୍ରଭାବିତ ହେଉଥିବାରୁ ଆନ୍ଦୋଳନ କରୁଥିବା କିମ୍ବା କୋର୍ଟ କାର୍ଯ୍ୟ ବଏକଟ କରିଥିବା ଜିଲ୍ଲା ଓକିଲ ସଂଘର ସଦସ୍ୟ ତୁରନ୍ତ ଏଥିରୁ ନିବୃତ ହୋଇ କାର୍ଯ୍ୟରେ ଯୋଗଦିଅନ୍ତୁ । ନଚେତ୍‌ ବାଧ୍ୟହୋଇ ଉକ୍ତ ଆଇନଜୀବୀଙ୍କ ଲାଇସେନ୍ସ ରଦ୍ଦ କରିବାକୁ କାଉନସିଲ ବାଧ୍ୟ ହେବ ।

ନୋଟିସରେ ଉଲ୍ଲେଖ ରହିଛି ଯେ, ବିଭିନ୍ନ କାରଣରୁ ସମ୍ବଲପୁର ଜିଲ୍ଲା ଓକିଲ ସଂଘ, କଟକ ଜିଲ୍ଲାର ବଡମ୍ବା ଓକିଲ ସଂଘ, ଖୋର୍ଦ୍ଧା ଜିଲ୍ଲାର ଟାଙ୍ଗି ବାର ଆସୋସିଏସନ, ଅନୁଗୋଳର ତାଳଚେର ବାର୍‌ ଆସୋସିଏସନ ଓ ପାଲଲହଡା ବାର୍‌ ଆସୋସିଏସନର ଆନ୍ଦୋଳନ ତୁରନ୍ତ ପ୍ରତ୍ୟାହର କରାଯାଉ । ଏଥିସହ ଟାଙ୍ଗି ଓକିଲ ସଂଘର ସଭାପତି ନକୁଳ କୁମାର ନାୟକଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି । ସଂଘର ଜଣେ ସଦସ୍ୟ ଟାଙ୍ଗିରେ କାର୍ଯ୍ୟରତ ମହିଳା ଜୁଡିସିଆଲ ମାଜିଷ୍ଟ୍ରେଟଙ୍କୁ ଦୁର୍ବ୍ୟବହାର କରିବା ଓ ଧମକ ଦେବାର ଅଭିଯୋଗ ରହିଛି । ଏହି କାର୍ଯ୍ୟ ପାଇଁ କାହିଁକି ତାଙ୍କର ଲାଇସେନ୍ସ ରଦ୍ଦ କରାନଯିବ ବୋଲି ସଭାପତିଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି ।

ଏହା ମଧ୍ୟ ପଢନ୍ତୁ:ଲାଇସେନ୍ସ ବାତିଲ ହେଲେ ମଧ୍ୟ ଜାରି ରହିବ ଆନ୍ଦୋଳନ: ସମ୍ବଲପୁର ଜିଲ୍ଲା ଓକିଲ ସଂଘ

ସେପଟେ ଏହାକୁ ଗ୍ରହଣ କରାଯିବ ନାହିଁ ବୋଲି କହିଛି ସମ୍ବଲପୁର ଜିଲ୍ଲା ଓକିଲ ସଂଘ । ଲାଇସେନ୍ସ ବାତିଲ ହେଲେ ମଧ୍ୟ ଜାରି ରହିବ ଆନ୍ଦୋଳନ ବୋଲି କହିଛି ସମ୍ବଲପୁର ଜିଲ୍ଲା ଓକିଲ ସଂଘ । ଆଜି ସମ୍ବଲପୁର ଜିଲ୍ଲା ଓକିଲ ସଂଘର ଏକ ସାଧାରଣ ପରିଷଦ ବୈଠକ ଅନୁଷ୍ଠିତ ହୋଇଥିଲା । ଯେଉଁଥିରେ ସର୍ବ ସମ୍ମତି କ୍ରମେ ଏହି ନିଷ୍ପତି ନିଆଯାଇଛି ଯେ ଓକିଲଙ୍କ ଆନ୍ଦୋଳନ ଅଟକିବ ନାହିଁ । ଆନ୍ଦୋଳନ ପୂର୍ବ ପରି ଜାରି ରହିବ (lawyers association threaten to continue protest) । କୌଣସି ଜଣେ ଓକିଲଙ୍କ ବିରୋଧରେ କାର୍ଯ୍ୟାନୁଷ୍ଠାନ ବା ତାଙ୍କର ଲାଇସେନ୍ସ ରଦ୍ଦ ହେଲେ ସମ୍ବଲପୁର ଜିଲ୍ଲା ଓକିଲ ସଂଘର ସମସ୍ତ 1600 ଓକିଲ ନିଜର ଲାଇସେନ୍ସ (ସରେଣ୍ଡର) surrender କରିବେ ବୋଲି ଜିଲ୍ଲା ଓକିଲ ସଂଘ ପକ୍ଷରୁ ଚେତାବନୀ ଦିଆଯାଇଛି ।

ଇଟିଭି ଭାରତ, କଟକ