କଟକ: ରାଜ୍ୟରେ କାର୍ଯ୍ୟବନ୍ଦ ଆନ୍ଦୋଳନରେ ସାମିଲଥିବା ଜିଲ୍ଲା ଓକିଲ ସଂଘକୁ, ବାର୍ ଆସୋସିଏସନ ଅଫ ଇଣ୍ଡିଆ ପକ୍ଷରୁ କଡା ନୋଟିସ୍ । ଆନ୍ଦୋଳନ ପ୍ରତ୍ୟାହାର କରି ତୁରନ୍ତ କାର୍ଯ୍ୟରେ ଯୋଗଦେବା ସହ କୋର୍ଟକାର୍ଯ୍ୟ ସ୍ବାଭାବିକ କରିବାକୁ ନିର୍ଦ୍ଦେଶ ରହିଛି । ବାର୍ ଆସୋସିଏସନ ଅଫ ଇଣ୍ଡିଆ ଓଡିଶା ଚେୟାରମ୍ୟାନଙ୍କ ଉଦ୍ଦେଶ୍ୟରେ ଏହି ନୋଟିସ ଆସିଛି । ନୋଟିସରେ ଏହା ଉଲ୍ଲେଖ ରହିଛି ଯେ, କୋର୍ଟ କାର୍ଯ୍ୟ ଗୁରୁତର ଭାବେ ପ୍ରଭାବିତ ହେଉଥିବାରୁ ଆନ୍ଦୋଳନ କରୁଥିବା କିମ୍ବା କୋର୍ଟ କାର୍ଯ୍ୟ ବଏକଟ କରିଥିବା ଜିଲ୍ଲା ଓକିଲ ସଂଘର ସଦସ୍ୟ ତୁରନ୍ତ ଏଥିରୁ ନିବୃତ ହୋଇ କାର୍ଯ୍ୟରେ ଯୋଗଦିଅନ୍ତୁ । ନଚେତ୍ ବାଧ୍ୟହୋଇ ଉକ୍ତ ଆଇନଜୀବୀଙ୍କ ଲାଇସେନ୍ସ ରଦ୍ଦ କରିବାକୁ କାଉନସିଲ(Bar council of India) ବାଧ୍ୟ ହେବ ।
ନୋଟିସରେ ଉଲ୍ଲେଖ ରହିଛି ଯେ, ବିଭିନ୍ନ କାରଣରୁ ସମ୍ବଲପୁର ଜିଲ୍ଲା ଓକିଲ ସଂଘ, କଟକ ଜିଲ୍ଲାର ବଡମ୍ବା ଓକିଲ ସଂଘ, ଖୋର୍ଦ୍ଧା ଜିଲ୍ଲାର ଟାଙ୍ଗି ବାର୍ ଆସୋସିଏସନ, ଅନୁଗୋଳର ତାଳଚେର ବାର୍ ଆସୋସିଏସନ ଓ ପାଲଲହଡା ବାର୍ ଆସୋସିଏସନର ଆନ୍ଦୋଳନ ତୁରନ୍ତ ପ୍ରତ୍ୟାହର କରାଯାଉ । ଏଥିସହ ଟାଙ୍ଗି ଓକିଲ ସଂଘର ସଭାପତି ନକୁଳ କୁମାର ନାୟକଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି ।