କଟକ: କଟକ ଜଗତପୁର ନିକଟସ୍ଥ ପଶ୍ଚିମକଛ ଗାଁରୁ ଅଲକାଏଦା ଲିଙ୍କରେ ଗିରଫ ହୋଇଥିବା ଅବଦୁର ରେହମାନ ଦେଶଦ୍ରୋହ ମାମଲାରେ ଦୋଷୀ ସାବ୍ୟସ୍ତ ହୋଇଛି । ଦିଲ୍ଲୀର ପଟିଆଲା ହାଉସ କୋର୍ଟରେ ଏହି ମାମଲାର ଶୁଣାଣି ଚାଲିଥିବା ବେଳେ ରେହମାନକୁ ଆତଙ୍କବାଦୀ ଲିଙ୍କରେ ଦୋଷୀ ସାବ୍ୟସ୍ତ କରିଛନ୍ତି ଅଦାଲତ । ଆସନ୍ତା ୧୪ ତାରିଖରେ ଦୋଷୀ ସାବ୍ୟସ୍ତ ଅବଦୁଲ ରେହମାନର ଦଣ୍ଡ ଘୋଷଣା କରାଯିବ । ରେହମାନ ନାଁରେ ଦେଶଦ୍ରୋହ ନେଇ ଅନେକ ଅଭିଯୋଗ ରହିଥିଲା ।
ଅବଦୁର ରେହମାନ ଭାରତରୁ ଏକାଧିକ ଥର ଲୁଚି କରି ପାକିସ୍ତାନ ଗସ୍ତ କରିଥିଲା । ଏମିତିକି ସେଠାରେ ଥିବା ଉଗ୍ରବାଦୀ ସଂଗଠନ ଅଲକାଏଦା ଆତଙ୍କବାଦୀ ସଂଗଠନ ସହ ମିଶି ଟ୍ରେନିଂ ନେଇଥିବା ଜଣାପଡ଼ିଥିଲା । ରେହମାନକୁ ଜାତୀୟ ତଦନ୍ତକାରୀ ସଂସ୍ଥା NIA କମିସନରେଟ୍ ପୋଲିସ ସହାୟତାରେ ୨୦୧୫ ଡିସେମ୍ବର ୧୬ ତାରିଖରେ ଜଗତପୁର ଥାନା ଅନ୍ତର୍ଗତ ପଶ୍ଚିମକଚ୍ଛରୁ ବିଳମ୍ବିତ ରାତିରେ ଗିରଫ କରାଯାଇଥିଲା । ଏହି ମାମଲାରେ ମହମ୍ମଦ ଆସିଫ, ମହମ୍ମଦ ଅବଦୁର ରେହମାନ, ଜାଫର ମାସୁଦ ଏବଂ ଅବଦୁଲ ସାମି ମୋଟ୍ ୪ ଜଣଙ୍କୁ ଗିରଫ କରିଥିଲା NIA । ବେଆଇନ ମଦ୍ରାସା ଚଳାଇବା, ଅସ୍ତ୍ରଶସ୍ତ୍ର ତାଲିମ ଦେବା ଓ ଉତ୍ତେଜନା ସୃଷ୍ଟି କରିବା ଭଳି ଭାଷଣ ଦେବା ଆଦିର ପ୍ରମାଣ ତଦନ୍ତକାରୀ ସଂସ୍ଥା ହାତରେ ଲାଗିଥିଲା ।
NIA ରେହମାନକୁ ରିମାଣ୍ଡରେ ନେଇ ମାମଲାର ଟିକିନିଖି ତଦନ୍ତ କରିଥିଲା । ଅବଦୁର ବିରୋଧରେ ଓଡି଼ଶା କ୍ରାଇମବ୍ରାଞ୍ଚ ମଧ୍ୟ ତଦନ୍ତ କରିଥିଲା । ବେଆଇନ କାର୍ଯ୍ୟକଳାପ (ପ୍ରିଭେନସନ୍) ଆକ୍ଟ, ୧୯୬୭ର ଧାରା ୧୬, ୧୭, ୧୮, ୧୮-ବି, ୨୦, ୨୧, ୩୮, ୪୦ ଓ ଆଇପିସିର ଦଫା ୧୨୪-ଏରେ ରେହମାନ ବିରୋଧରେ ଅଦାଲତରେ ଚାର୍ଜଫ୍ରେମ୍ କରାଯାଇଥିଲା । ଗତ କିଛି ମାସ ହେବ ସେ କୋର୍ଟଙ୍କ ଅନୁମତିକ୍ରମେ ଚୌଦ୍ୱାର ଜେଲରେ ରହି ଆସୁଥିଲା ।