ଭୁବନେଶ୍ବର: ଦୁର୍ନୀତିଗ୍ରସ୍ତ ନବୀନ ପାଣ୍ଡିଆନ ସରକାର ବିରୋଧରେ ସେ ସ୍ବର ଉତ୍ତୋଳନ କରିଛନ୍ତି । ଏଥିପାଇଁ ସେ ମନ୍ତ୍ରୀ ପଦ ଛାଡିଛନ୍ତି । କେବେ ହେଲେ ପୁଣି ଦଳକୁ ଫେରିବେ ନାହିଁ ବୋଲି ଆଜି ସ୍ପଷ୍ଟ କରିଛନ୍ତି ବରିଷ୍ଠ ରାଜନେତା ତଥା ବିଜେଡିରୁ ବହିଷ୍କୃତ ହୋଇଥିବା ଦାମୋଦର ରାଉତ ।
ନିକଟରେ କିଛି ଗଣମାଧ୍ୟମରେ ଖବର ପ୍ରକାଶ ପାଇଥିଲା ଯେ ବିଜେଡି ସହ ଡିଲ ଯୋଗୁଁ ସେ ପ୍ରସ୍ତାବିତ ଦିଲ୍ଲୀ ଗସ୍ତକୁ ବାତିଲ କରିଛନ୍ତି । ଯାହାକୁ ନେଇ ଦାମ ଆଜି ସୋସିଆଲ ମିଡିଆ ମାଧ୍ୟମରେ ପ୍ରବଳ ବର୍ଷିଛନ୍ତି । ସୋସିଆଲ ମିଡିଆ ଆକାଉଣ୍ଟ ଫେସବୁକରେ ଏକ ପୋଷ୍ଟ କରି ସେ ଗଣମାଧ୍ୟମକୁ ଭର୍ସନା କରିବା ସହ ଏହି ପ୍ରସଙ୍ଗରେ ନିଜର ସ୍ପଷ୍ଟୀକରଣ ଦେଇଛନ୍ତି ।
ଉଲ୍ଲେଖଯୋଗ୍ୟ ଯେ ୧୨ ଘଣ୍ଟା ତଳେ ସେ ଏହି ପ୍ରସଙ୍ଗ ଉପରେ ମନ୍ତବ୍ୟ ରଖିଥିବାବେଳେ ପୁଣିଥରେ ସେ ସ୍ପଷ୍ଟୀକରଣ ଦେଇଛନ୍ତି । ଗୁରୁବାର ଭୋର ସମୟରେ ଏହି ଲେଖା ସେ ପୋଷ୍ଟ କରିଥିଲେ । ଏଥିରେ ସେ ନବୀନ ପଟ୍ଟନାୟକଙ୍କୁ ଟାର୍ଗେଟ କରିବା ସହ ତାଙ୍କୁ ନବୀନ ପାଣ୍ଡିଆନ ସରକାର ବୋଲି କହିଛନ୍ତି । ସେ ଆହୁରି କହିଛନ୍ତି ଯେ ଦୁର୍ନୀତିଗ୍ରସ୍ତ ନବୀନ ପାଣ୍ଡିଆନ ସରକାର ବିରୁଦ୍ଧରେ ସେ ସ୍ୱର ଉତ୍ତୋଳନ କରିଛନ୍ତି । ଏପରିକି ମନ୍ତ୍ରୀପଦ ତ୍ୟାଗ କରି ଦଳ ଛାଡିଛନ୍ତି ।