ଫ୍ଲୋରାଇଡ ଯୁକ୍ତ ପାଣି ନେଇ ଗ୍ରାମବାସୀଙ୍କ ପ୍ରତିବାଦ, ଲୋକେ ହନ୍ତସନ୍ତ

ଦୀର୍ଘ ଦୁଇବର୍ଷ ଧରି ଏହି ବିଷାକ୍ତ ପାଣିକୁ ବ୍ୟବହାର ଅନୁପଯୋଗୀ ଘୋଷଣା କରାଯାଇଛି । ତେବେ ଦୀର୍ଘଦିନ ଧରି ଗୁହାରି ପରେ କୌଣସି ସୁଫଳ ନମିଳିବାରୁ ଆଜି(ଗୁରୁବାର) ଗ୍ରାମବାସୀ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବସିଛନ୍ତି ।

ବୌଦ୍ଧ: ନଳକୂପରୁ ବାହାରୁଛି ଫ୍ଲୋରାଇଡଯୁକ୍ତ ପାଣି । ଦୀର୍ଘ ଦୁଇବର୍ଷ ଧରି ଏହି ବିଷାକ୍ତ ପାଣିକୁ ବ୍ୟବହାର ଅନୁପଯୋଗୀ ଘୋଷଣା କରାଯାଇଛି । ତେବେ ଦୀର୍ଘଦିନ ଧରି ଗୁହାରି ପରେ କୌଣସି ସୁଫଳ ନମିଳିବାରୁ ଆଜି(ଗୁରୁବାର) ଗ୍ରାମବାସୀ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବସିଛନ୍ତି ।

ପ୍ରତ୍ୟେକ ଗ୍ରାମକୁ ବିଶୁଦ୍ଧ ପାନୀୟ ଜଳଯୋଗାଣ ପାଇଁ ସରକାର ଲକ୍ଷ୍ୟ ରଖିଥିବାବେଳେ ଏବେବି ଏଭଳି ଅନେକ ଗ୍ରାମ ରହିଛି, ଯେଉଁଠି ଆଜି ମଧ୍ୟ ଲୋକେ ଦୂଷିତ ନଚେତ ଝରଣାରୁ ଚୂଆ ଖୋଳି ପାଣି ବ୍ୟବହାର କରୁଛନ୍ତି । ବୌଦ୍ଧ ଜିଲ୍ଲା ଶଗଡା ପଞ୍ଚାୟତର ଝାଙ୍କରପଡା ଗ୍ରାମରେ ପ୍ରାୟ ପାଞ୍ଚ ଶହରୁ ଊର୍ଦ୍ଧ୍ବ ଲୋକ ବସବାସ କରନ୍ତି ।

ଫ୍ଲୋରାଇଡ ଯୁକ୍ତ ପାଣି ନେଇ ଗ୍ରାମବାସୀଙ୍କ ପ୍ରତିବାଦ

ଗ୍ରାମରେ ଥିବା ତିନୋଟି ନଳକୂପ ମଧ୍ୟରୁ ଗୋଟିଏ ଦୀର୍ଘଦିନ ହେଲା ଅଚଳ ଥିବାବେଳେ ଅନ୍ୟ ଦୁଇଟିରୁ ପ୍ରାୟ ଦୁଇବର୍ଷ ହେଲା ଫ୍ଲୋରାଇଡ ଯୁକ୍ତ ପାଣି ବାହାରିଥିଲା । ଯାହାକୁ ନେଇ ପରୀକ୍ଷା ପରେ ତାହା ବ୍ୟବହାର ଅନୁପଯୋଗୀ ବୋଲି ଘୋଷଣା କରାଯାଇଥିଲା ।

ତେବେ ପାନୀୟ ଜଳ ସମସ୍ୟା ନେଇ ଗତ ବର୍ଷରୁ ଊର୍ଦ୍ଧ୍ବ ସମୟ ପୂର୍ବରୁ ଜିଲ୍ଲା ପ୍ରଶାସନ ଓ ଗ୍ରାମ୍ୟ ଜଳଯୋଗାଣ ବିଭାଗରେ ଗୁହାରି ପରେ ତୁରନ୍ତ ଏହାର ସମାଧାନ ପାଇଁ ପ୍ରତିଶ୍ରୁତି ମିଳିଥିଲା । ହେଲେ ପ୍ରତିଶ୍ରୁତି ପୂରଣ ନହେବାରୁ ଆଜି ମଧ୍ୟ ଗାଁର ମହିଳା ଓ ପୁରୁଷ ଦୀର୍ଘ ରାସ୍ତା ଅତିକ୍ରମ କରି ପାହାଡି ଝରଣାର ଶୁଖିଲା ଶଯ୍ୟାରୁ ଚୂଆଖୋଳି ପିଇବା ପାଣି ସଂଗ୍ରହ କରୁଥିବା ଅଭିଯୋଗ ହୋଇଛି ।

ଆଜି ଏନେଇ ଅସନ୍ତୋଷ ଗ୍ରାମବାସୀ ଉଭୟ ଗ୍ରାମ୍ୟ ଜଳଯୋଗାଣ ବିଭାଗ ଓ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଦୀର୍ଘ ସମୟ ଧରି ବସି ରହିଥିଲେ । ଏନେଇ ଗ୍ରାମବାସୀଙ୍କ ପକ୍ଷରୁ ଏକ ଦାବିପତ୍ର ପ୍ରଶାସନକୁ ପ୍ରଦାନ କରାଯାଇଛି । ଜିଲ୍ଲାପାଳ ପାନୀୟଜଳ ସମସ୍ୟା ଓ ସମାଧାନ ସମ୍ପର୍କରେ ସୂଚନା ଦେଇଛନ୍ତି ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ