ବୌଦ୍ଧ : କଣ୍ଟାମାଳ ବ୍ଲକରେ ବାଟବଣା ସରକାରୀ ଯୋଜନା । ମାଳମାଳ ସମସ୍ୟାରେ ଛନ୍ଦି ହୋଇ ରହିଛି କଣ୍ଟାମାଳ । ସରକାରଙ୍କ ବିକାଶମୂଳକ ଯୋଜନା ବ୍ଲକର ବିଭିନ୍ନ ପଞ୍ଚାୟତରେ ଆଜି ମଧ୍ୟ ଅପହଞ୍ଚ । ଯାହାକୁ ନେଇ ଜିଲ୍ଲାପାଳଙ୍କୁ ଅଭିଯୋଗ କରିଛନ୍ତି ସାମାଜିକ କର୍ମୀ ।
ତେବେ ୨୪ ଗୋଟି ପଞ୍ଚାୟତକୁ ନେଇ ଗଠିତ କଣ୍ଟାମାଳ ବ୍ଲକ । ହେଲେ କଣ୍ଟାମାଳ ବ୍ଲକ ମାଳମାଳ ସମସ୍ୟା ଘେରରେ ଛନ୍ଦି ହୋଇ ରହିଥିବାରୁ ବ୍ଲକର ବିଭିନ୍ନ ପଞ୍ଚାୟତରେ ସରକାରଙ୍କ ବିକାଶର ଗାଡି ଠିକରେ ପହଞ୍ଚି ପାରିନାହିଁ । ବରଗୋଛା ପଞ୍ଚାୟତଠାରୁ ନେଇ ବରଗାଁ ପଞ୍ଚାୟତ ଓ ରେଙ୍ଗାଲୀ ପଞ୍ଚାୟତଠାରୁ ନେଇ ଖମନମୁଣ୍ଡା ପଞ୍ଚାୟତ ପର୍ଯ୍ୟନ୍ତ ଅଧିକାଂଶ ପଞ୍ଚାୟତରେ ଗାଁ କଲ୍ୟାଣ ସମିତି ଆଦୌ କାର୍ଯ୍ୟକାରୀ ହେଉନାହିଁ । ଫଳରେ ବର୍ତ୍ତମାନ ବିଭିନ୍ନ ପଞ୍ଚାୟତରେ ଥିବା ଗ୍ରାମର ତଳ ସ୍ତରରେ ଉନ୍ନୟନ କାର୍ଯ୍ୟ ବାଧାପ୍ରାପ୍ତ ହୋଇ ରହିଛି । ଗ୍ରାମ୍ୟ ଜଳଯୋଗାଣ ଓ ପରିମଳ ବ୍ୟବସ୍ଥା ସମ୍ପୂର୍ଣ୍ଣ ଭୁଷୁଡ଼ି ପଡ଼ିଥିବା ବେଳେ ଅନେକ ଉପାନ୍ତ ଅଞ୍ଚଳରେ ଥିବା ଗ୍ରାମକୁ ସବୁଦିନିଆ ରାସ୍ତା ଖଣ୍ଡିଏ ନାହିଁ ।
ଏନେଇ ବାରମ୍ବାର ସ୍ଥାନୀୟ ଗ୍ରାମବାସୀମାନେ ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁନାହିଁ । ପରିସ୍ଥିତି ଏପରି ହୋଇଛି ଯେ ଖାସ ବ୍ଲକ ସଦର ମହକୁମା କଣ୍ଟାମାଳକୁ ଏକ ପୌରାଞ୍ଚଳରେ ପରିଣତ ପାଇଁ ଦୀର୍ଘ ବର୍ଷ ହେଲା ପ୍ରତିଶ୍ରୁତି ଦିଆଯାଉ ଥିଲେ ମଧ୍ୟ ତାହା କେବଳ ପ୍ରତିଶ୍ରୁତିରେ ରହିଯାଇଛି । ସେହିପରି କଣ୍ଟାମାଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଦୀର୍ଘ ଦିନ ହେଲା ବିଶେଷଜ୍ଞ ଡାକ୍ତରଙ୍କ ଅଭାବ ସାଙ୍ଗକୁ ବିଭିନ୍ନ ଦୁର୍ଗମ ଅଞ୍ଚଳକୁ ଆମ୍ବୁଲାନ୍ସ ସେବା ଅପହଞ୍ଚ ହୋଇ ରହିଛି । ଏପରିକି ଖାସ କଣ୍ଟାମାଳ ବ୍ଲକର ପଛ ପାର୍ଶ୍ଵରେ ଥିବା ବନ୍ଧପାଲି ଗ୍ରାମର ବିଦ୍ୟାଳୟ ଓ ଗାଁ ରାସ୍ତାକୁ ଦେଖିଲେ ଅଞ୍ଚଳର ବିକାଶ କିଭଳି ହୋଇଥିବ ତାହା ସହଜରେ ଅନୁମେୟ ।