ବୌଦ୍ଧ: ବୟସ 70ରୁ ଉର୍ଦ୍ଧ୍ବରୁ ଅଧିକ । ପକ୍ଷାଘାତ ଭଳି ରୋଗରେ ଆକ୍ରାନ୍ତ ହେବା ପରେ ଦୀର୍ଘ ଦିନ ହେବ ଖଟରେ ବିତୁଛି ତାଙ୍କର ଶେଷ ଜୀବନ । କିନ୍ତୁ ଏବେ ସୁଦ୍ଧା କୌଣସି ସରକାରୀ ଯୋଜନାର ସୁଫଳ ପାଇ ପାରିନାହାନ୍ତି ହିତାଧିକାରୀ । ହରଭଙ୍ଗା ବ୍ଲକ ବାମଣ୍ଡା ପଞ୍ଚାୟତ ଅନ୍ତର୍ଗତ ଦେବଗଡ ଗ୍ରାମ ରଘୁନାଥ ସାହିସ୍ଥିତ ହରି ଦୀପଙ୍କ କଥା । ଯାହାଙ୍କ ପାଇଁ ଏବେ ସାତ ସପନ ସାଜିଛି ସରକାରଙ୍କ ମାଳ ମାଳ ଯୋଜନା ।
ଭିଡିଓ ସୌଜନ୍ୟ: ପ୍ରତିନିଧି, ବୌଦ୍ଧ
ହରିଙ୍କୁ ପ୍ରାୟ 70 ବର୍ଷ ଉପରେ ହେଲେ ଆଜି ଯାଏ ମିଳିପାରିଲା ନାହିଁ ବାର୍ଦ୍ଧକ୍ୟ ଭତ୍ତା । ବାରମ୍ବାର ଗୁହାରୀ ପରେ ମଧ୍ୟ ଶୁଣୁନାହାନ୍ତି ପ୍ରଶାସନ । କିଛି ବର୍ଷ ହେବ ହରି ପକ୍ଷାଘାତ ରୋଗରେ ପୀଡିତ ହେବା ସହ ମାନସିକ ସମସ୍ୟାରେ ଗତି କରୁଛନ୍ତି । ବୋଝ ଉପରେ ନଳିତା ବିଡା ସଦୃଶ ତାଙ୍କ ଜୀବନରେ ମାଡି ଆସିଛି ଦୁଃଖ । ତଥାପି କୌଣସି ସରକାରୀ ସହାୟତା ନପାଇ ସେ ସପତ୍ନୀକ ନିଜ ଭାଗ୍ୟକୁ ଆଦରି ପଡିରହିଛନ୍ତି ।