ଆଜି ବି ମୌଳିକ ଅଧିକାରରୁ ବଞ୍ଚିତ ଗୋଠିସାହି ବସ୍ତିବାସିନ୍ଦା

ସ୍ଥାନୀୟ ହରଭଙ୍ଗା ବ୍ଲକ ଅନ୍ତର୍ଗତ ବୀରନରସିଂପୁର ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ରହିଛି ଗୋଠସାହି ବସ୍ତି । ଯେଉଁଠି ଆଜି ବି ନାହିଁ ସର୍ବନିମ୍ନ ମୌଳିକ ସୁବିଧା । ଏନେଇ ବାରମ୍ବାର ଗୁହାରି କଲେ ମଧ୍ୟ କେହି କର୍ଣ୍ଣପାତ କରୁନଥିବା ଗ୍ରାମବାସୀ ଅଭିଯୋଗ କରିଛନ୍ତି ।

ବୌଦ୍ଧ: ସ୍ଥାନୀୟ ହରଭଙ୍ଗା ବ୍ଲକ ଅନ୍ତର୍ଗତ ବୀରନରସିଂପୁର ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ରହିଛି ଗୋଠସାହି ବସ୍ତି । ଯେଉଁଠି ଆଜି ବି ନାହିଁ ସର୍ବନିମ୍ନ ମୌଳିକ ସୁବିଧା । ଏନେଇ ବାରମ୍ବାର ଗୁହାରି କଲେ ମଧ୍ୟ କେହି କର୍ଣ୍ଣପାତ କରୁନଥିବା ଗ୍ରାମବାସୀ ଅଭିଯୋଗ କରିଛନ୍ତି । ଯଦି ପଞ୍ଚାୟତ ନିକଟରେ ଏଭଳି ଦୃଶ୍ୟ ତେବେ ଅନ୍ୟ ସ୍ଥାନର କଥା କିଏ ପଚାରେ ।

ଏହି ବସ୍ତିରେ ବର୍ଷା ଦିନ ଅବସ୍ଥା ଅତି ଶୋଚନୀୟ ହୋଇପଡେ । ଏମିତିରେ ବର୍ଷର ଅନ୍ୟ ସମୟରେ ମଧ୍ୟ ଭଲ ରାସ୍ତା ଖଣ୍ଡେ ନଥିବାରୁ ନାହିଁ ନଥିବା ଅସୁବିଧାର ସମ୍ମୁଖୀନ ହୁଅନ୍ତି ବସ୍ତିବାସୀ । ସେପଟେ ବସ୍ତିବାସୀଙ୍କ ଶୋଷ ମେଣ୍ଟାଇବା ପାଇଁ ବସ୍ତିରେ ରହିଛି ଗୋଟିଏ ମାତ୍ର ନଳକୂପ । ଯେଉଁଥିରୁ ଦୀର୍ଘ ଦିନ ହେବ ଫ୍ଲୋରାଇଡ ଯୁକ୍ତ ପାଣି ବାହାରୁ ଥିବାରୁ ପାନୀୟ ଜଳ ପାଇଁ ବସ୍ତିବାସୀ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।

ତେବେ ଦୀର୍ଘ ବର୍ଷ ହେଲା ବିଦ୍ୟୁତ ପୋଲ ପୋତାଯାଇ ପ୍ରତ୍ୟେକଙ୍କ ଘରେ ମିଟର ଲଗାଇ ସରଞ୍ଜାମ ସଜାଇ ଦିଆଯାଇଛି । ହେଲେ ବିଦ୍ୟୁତ ସଂଯୋଗ ଦିଆଯାଇ ନଥିବାରୁ ବସ୍ତିବାସୀ ଆଜି ମଧ୍ୟ ଅନ୍ଧାରରେ କାଳ କାଟୁଛନ୍ତି । ଏପରିକି ବସ୍ତିର ବିଧବା ମହିଳା ଦୀର୍ଘ ଦିନ ଧରି ବିଧବା ଭତ୍ତା ଟିକକ ପାଇ ପାରୁନାହାନ୍ତି । ତୁରନ୍ତ ଏଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେଇ ପଦକ୍ଷେପ ଗ୍ରହଣ କରିବାକୁ ବସ୍ତିବାସୀ ଗୁହାରୀ କରିଛନ୍ତି ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ