ଅବକାରୀ ବିଭାଗ ଗୋଦାମ ଘର ଆଗରେ ଗଞ୍ଜେଇ ଗଛ, ସୁରାକ ପାଉନାହାନ୍ତି ସରକାରୀ ବାବୁ

ଗଞ୍ଜେଇ ଚାଷକୁ ବେଆଇନ ଘୋଷଣା କରାଯାଇଥିବା ବେଳେ ଖୋଦ ଅବକାରୀ ବିଭାଗ ନାକତଳେ ଚାଲିଛି ଗଞ୍ଜେଇ ଚାଷ । ଜିଲ୍ଲାର ଅବକାରୀ ବିଭାଗ ଅଧିକ୍ଷକଙ୍କ କାର୍ଯ୍ୟାଳୟଠାରୁ ମାତ୍ର କେଇ ମିଟର ଦୂରରେ ଏକାଧିକ ଗଞ୍ଜେଇ ଗଛ ରହିଥିବା ବେଳେ ଏହାର ସୁରାକ ପାଉନାହାନ୍ତି ଅବକାରୀ ବାବୁ ।

ବୌଦ୍ଧ: ଗଞ୍ଜେଇ ଚାଷକୁ ବେଆଇନ ଘୋଷଣା କରାଯାଇଥିବା ବେଳେ ଖୋଦ ଅବକାରୀ ବିଭାଗ ନାକତଳେ ଚାଲିଛି ଗଞ୍ଜେଇ ଚାଷ । ଜିଲ୍ଲାର ଅବକାରୀ ବିଭାଗ ଅଧିକ୍ଷକଙ୍କ କାର୍ଯ୍ୟାଳୟ ଠାରୁ ମାତ୍ର କେଇ ମିଟର ଦୂରରେ ଏକାଧିକ ଗଞ୍ଜେଇ ଗଛ ରହିଥିବା ବେଳେ ଏହାର ସୁରାକ ପାଉନାହାନ୍ତି ଅବକାରୀ ବାବୁ । ଯାହା ଜିଲ୍ଲା ଅବକାରୀ ବିଭାଗର ସଜାଗପଣିଆକୁ ଖୁବ ସ୍ପଷ୍ଟ କରୁଛି ।

ସୂଚନା ଅନୁଯାୟୀ ଜିଲ୍ଲା ଅବକାରୀ ବିଭାଗର ଏକ ଗୋଦାମ ଘର ପ୍ରସ୍ତୁତ ହୋଇଛି ଅବ୍ୟବହୃତ ଅବସ୍ଥାରେ ପଡି ରହିଛି । ଘରଟି ଦୀର୍ଘ ଦିନ ହେବ ନିର୍ମାଣ ସରିଥିବା ବେଳେ ଏହା କାର୍ଯ୍ୟକ୍ଷମ ହୋଇନପାରି ଅସାମାଜିକ ଲୋକଙ୍କ ଆଡ୍ଡାସ୍ଥଳୀ ପାଲଟିଛି । ଏମିତିରେ ଠିକ୍‌ ଗୋଦାମ ଘର ସାମ୍ନାରେ ଥିବା ପ୍ରସିଦ୍ଧ କଚେରୀ ପଡିଆର ଗୋଟିଏ କୋଣରେ ଲାଗିଛି ଏକାଧିକ ଗଞ୍ଜେଇ ଗଛ ।

ଗଛଗୁଡିକ ସାତ ଫୁଟରୁ ଅଧିକ ଉଚ୍ଚ ହୋଇଥିବା ବେଳେ ଏହାକୁ ଦେଖି ବି ଅଣଦେଖା କରୁଛନ୍ତି ସରକାର ବାବୁ । ତେବେ ସରକାରୀ କାର୍ଯ୍ୟାଳୟ ସାମ୍ନାରେ ଏପରି ଗଞ୍ଜେଇ ଗଛ ଥାଇ ମଧ୍ୟ କିପରି ବିଭାଗୀୟ ଅଧିକାରୀ କିଛି ସୁରାକ ପାଉନାହାନ୍ତି, ତାହା ଚର୍ଚ୍ଚାର ବିଷୟ ପାଲଟିଛି ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ