ବୌଦ୍ଧ: ୟୁରିଆ ସାର ଯୋଗାଣକୁ ନେଇ କୃଷି ଅଧିକାରୀଙ୍କ ପ୍ରତିଶ୍ରୁତି ପୂରଣ ନ ହେବାରୁ ଉତ୍ତ୍ୟକ୍ତ ଚାଷୀ ପୁଣି କୃଷି କାର୍ଯ୍ୟାଳୟରେ ତାଲା ପକାଇଛନ୍ତି । ବୌଦ୍ଧ ଜିଲ୍ଲାରେ ୟୁରିଆ ସାରର ତାତି କମିବାର ନାଁ ନେଉନି । ଗତ 9 ତାରିଖରେ ଜିଲ୍ଲାର ବିଭିନ୍ନ ସ୍ଥାନରେ ୟୁରିଆ ସାରର ବ୍ୟାପକ କଳାବଜାର ଓ ଅଭାବି ବିକ୍ରିକୁ ନେଇ ଚାଷୀ କୃଷି କାର୍ଯ୍ୟାଳୟରେ ତାଲା ପକାଇଥିଲେ ।
ପୋଲିସ ଉପସ୍ଥିତିରେ କୃଷି ଅଧିକାରୀ 15 ତାରିଖରେ ଚାଷୀଙ୍କୁ ସାର ଯୋଗାଇ ଦେବାକୁ ପ୍ରତିଶ୍ରୁତି ଦେଇଥିଲେ । କିନ୍ତୁ ବର୍ତ୍ତମାନ କୃଷି ବିଭାଗ ଏଆରସିଏସଙ୍କ ଆଡକୁ ଓ ଏଆରସିଏସ କୃଷି ବିଭାଗ ଆଡକୁ ଦୋଷ ଲଦାଲଦି ହେବାରେ ଲାଗିଛନ୍ତି । ସେପଟେ ଆଜି ଚାଷୀଙ୍କୁ ୟୁରିଆ ସାର ଯୋଗାଇବାରେ କୃଷି ବିଭାଗ ବିଫଳ ହେବାରୁ ଉତ୍ତ୍ୟକ୍ତ ଚାଷୀ ଆଜି ପୁଣିଥରେ କୃଷି କାର୍ଯ୍ୟାଳୟରେ ତାଲା ପକାଇଛନ୍ତି । ସମବାୟ ବିଭାଗ ଓ କୃଷି ବିଭାଗୀୟ ଅଧିକାରୀଙ୍କ ଅପାରଗତା ଯୋଗୁଁ ଜିଲ୍ଲାରେ ଏଭଳି ପରିସ୍ଥିତି ଉପୁଜିଥିବା ଅଭିଯୋଗ ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
