ବୌଦ୍ଧ: ବୟସ ସତର ହେଲାଣି, ହେଲେ ମା କୋଳରେ ହିଁ ବିତୁଛି ଅଧିକାଂଶ ସମୟ । ଜନ୍ମରୁ ଦିବ୍ୟାଙ୍ଗ ଥିବା ସୁରଞ୍ଚି 75 ପ୍ରତିଶତ ଦିବ୍ୟାଙ୍ଗ ସାର୍ଟିଫିକେଟ ପାଇଥିଲେ ମଧ୍ୟ ପଚାଶ ପ୍ରତିଶତର ସରକାରୀ ଭତ୍ତା ପାଉଛି । ଏସମ୍ପର୍କରେ ଇଟିଭି ଭାରତ ନିକଟରୁ ଖବର ପାଇବା ପରେ ପଞ୍ଚାୟତ ଅଧିକାରୀ ଅତିଶୀଘ୍ର ଦିବ୍ୟାଙ୍ଗଙ୍କୁ ଆଉ ଦୁଇ ଶହ ଟଙ୍କା ଭତ୍ତା ବୃଦ୍ଧି କରାଯିବ ବୋଲି କହିଛନ୍ତି ।
ସୂଚନା ମୁତାବକ, ବୌଦ୍ଧ ଜିଲ୍ଲା ପଦ୍ମନପୁର ପଞ୍ଚାୟତ ଅନ୍ତର୍ଗତ ଦାମୋଦରପୁର ଗ୍ରାମର ସନ୍ତୋଷ ସେଠୀ ଓ ଦୁଲେଇ ସେଠୀଙ୍କ ଝିଅ ସୁରଞ୍ଚି । ଏବେ ସୁରଞ୍ଚିଙ୍କ ବୟସ 17 ବର୍ଷ । ହେଲେ ଏବେବି ସେ ଅଧିକାଂଶ ସମୟ ମା କୋଳରେ ବିତାଉଛନ୍ତି ।
ଭିଡିଓ ସୌଜନ୍ୟ: ପ୍ରତିନିଧି, ବୌଦ୍ଧ
ସରକାରୀ ଚିହ୍ନଟରେ ସୁରଞ୍ଚିଙ୍କୁ 75 ପ୍ରତିଶତ ଦିବ୍ୟାଙ୍ଗ ଦର୍ଶାଯାଇଛି । ହେଲେ ମାସିକ ଭତ୍ତା ହିସାବରେ ତାଙ୍କୁ ମାତ୍ର ତିନି ଶହ ଟଙ୍କା ମିଳୁଥିଲା । କିନ୍ତୁ ବର୍ତ୍ତମାନ ଦୁଇ ମାସ ହେଲା ସେ ପଚାଶ ପ୍ରତିଶତ ପାଇଁ ଉଦ୍ଦିଷ୍ଟ ପାଞ୍ଚ ଶହ ଟଙ୍କା ମାସିକ ଭତ୍ତା ପାଉଛନ୍ତି ।