ବୌଦ୍ଧ: ବିଶ୍ବକର୍ମା ଭସାଣୀରେ ଅଘଟଣ । ଭସାଣୀ ସରିବା ପରେ ଯୁବକଙ୍କ ରହସ୍ୟଜନକ ମୃତ୍ୟୁକୁ ନେଇ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି । ଏହା ଅପମୃତ୍ୟୁ ନା ଯୋଜନାବଦ୍ଧ ହତ୍ୟା ସେ ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ । ମୃତକଙ୍କ ପରିବାର ଏନେଇ ପୁରୁଣାକଟକ ଥାନାରେ ଲିଖିତ ଅଭିଯୋଗ କରିଛନ୍ତି ।
ଭିଡିଓ ସୌଜନ୍ୟ : ପ୍ରତିନିଧି,ବୌଦ୍ଧ ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ଖରଭୂଇଁ ନିକଟରେ ରହିଛି ଏଆରଏସଏସ କମ୍ପାନୀର କ୍ରସର ୟୁନିଟ । ଗତକାଲି ସନ୍ଧ୍ୟାରେ ବିଶ୍ବକର୍ମା ଭଷାଣୀ ଚାଲିଥିଲା । ଏହି ସମୟରେ ଧର୍ମେନ୍ଦ୍ର ଧଳ(୩୨) ହଠାତ ଅସୁସ୍ଥ ହୋଇପଡିଲେ । ସେଠାରୁ ତାଙ୍କୁ ଡାକ୍ତରଖାନାକୁ ନିଆନଯାଇ ପ୍ଲାଣ୍ଟରେ ନେଇ ଶୁଆଇ ଦିଆଗଲା । ରାତି ପ୍ରାୟ ସାଢେ ଏଗାର ଟାରେ ଧର୍ମେନ୍ଦ୍ରଙ୍କୁ ପୁରୁଣାକଟକ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।ବିଳମ୍ବିତ ରାତିରେ ଧର୍ମେନ୍ଦ୍ରଙ୍କ ମୃତ୍ୟୁ ହୋଇଥିଲା ।
ମୃତକ ଯାଜପୁର ଜିଲ୍ଲାର ଧର୍ମେନ୍ଦ୍ର ଧଳ ପ୍ଲାଣ୍ଟରେ ଅପରେଟର ଭାବେ କାର୍ଯ୍ୟ କରୁଥିଲେ । ଏ ସମ୍ପର୍କରେ ପ୍ଲାଣ୍ଟ ମ୍ୟାନେଜର ପ୍ରତିକ୍ରିୟା ଦେବାକୁ ସିଧାସଳଖ ମନା କରିବା ସହ ଓଲଟା ମୃତଦେହ ପଠାଇବାରେ ଅସହଯୋଗ କରିବାକୁ ଧମକ ଦେଇଛନ୍ତି ।
ବୌଦ୍ଧ ରୁ ସତ୍ୟ ନାରାୟଣ ପାଣି, ଈଟିଭି ଭାରତ
