ବିଜେଡି କବଜାରେ ବୌଦ୍ଧ, 5ମ ଥର ପାଇଁ ଜିତିଲେ ଅମାତ

ବୌଦ୍ଧରେ ବିଜେଡିର ମହା ବିଜୟ । ନିଜର ଚିର ପ୍ରତିଦ୍ୱନ୍ଦ୍ବୀ ସୁଶାନ୍ତ କୁମାର ପ୍ରଧାନଙ୍କୁ ହରାଇ ପଞ୍ଚମ ଥର ବୌଦ୍ଧର ବିଧାୟକ ହେଲେ ପ୍ରଦୀପ କୁମାର ଅମାତ ।

ବୌଦ୍ଧ: ପଞ୍ଚମ ଥର ପାଇଁ ବୌଦ୍ଧବାସୀଙ୍କ ଜନ ସମର୍ଥନ ପାଇଛନ୍ତି ବିଧାୟକ ପ୍ରଦୀପ କୁମାର ଅମାତ । ଗୁରୁବାର ଅନୁଷ୍ଠିତ ଭୋଟ ଗଣନାରେ ଅମାତ ନିଜର ପାରମ୍ପରିକ ପ୍ରତିଦ୍ୱନ୍ଦ୍ବୀ ସୁଶାନ୍ତ କୁମାର ପ୍ରଧାନଙ୍କୁ ହରାଇ ପଞ୍ଚମ ଥର ବୌଦ୍ଧର ବିଧାୟକ
ହୋଇଛନ୍ତି ।

ବୌଦ୍ଧ ଜିଲ୍ଲାର ଦୁଇ ନିର୍ବାଚନ ମଣ୍ଡଳୀ ବୌଦ୍ଧ ଓ କଣ୍ଟାମାଳ ଉଭୟ ଆସନ ପୁନର୍ବାର ବିଜେଡି ଦଖଲକୁ ଆସିଛି । ନିଜ ପ୍ରତିଦ୍ୱନ୍ଦ୍ବୀ ତଥା ବିଜେପି ପ୍ରାର୍ଥୀ ସୁଶାନ୍ତ କୁମାର ପ୍ରଧାନଙ୍କୁ ଦଶ ହଜାରରୁ ଊର୍ଦ୍ଧ୍ବ ଭୋଟରେ ପରାସ୍ତ କରିଛନ୍ତି ପ୍ରଦୀପ କୁମାର ଅମାତ । ସେପଟେ କଣ୍ଟାମାଳ ଆସନରେ ବିଜେଡିର ମହୀଧର ରଣା ନିଜ ପ୍ରତିଦ୍ୱନ୍ଦ୍ବୀ ତଥା ବିଜେପି ପ୍ରାର୍ଥୀ କହ୍ନେଇ ଚରଣ ଡାଙ୍ଗଙ୍କୁ ସାଢେ ତିନି ହଜାରରୁ ଊର୍ଦ୍ଧ୍ବ ଭୋଟରେ ପରାସ୍ତ କରିଛନ୍ତି । ବିଜୟ ସହ ବିଜେଡି ଶିବିରରେ ଆନନ୍ଦ ଓ ଖୁସିର ଲହରୀ ଖେଳିଯାଇଥିବା ବେଳେ ମହୀଧରଙ୍କ ଶେଷ ପର୍ଯ୍ୟାୟରେ ମ୍ୟାଜିକ ଭଳି ବିଜୟ କଣ୍ଟାମାଳର ବିଜେଡି ପ୍ରେମୀଙ୍କୁ ଆନନ୍ଦିତ କରିଛି ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ