ବୌଦ୍ଧ: ମେଡିକାଲ ବାରଣ୍ଡାରେ ପ୍ରସୂତି । ଜଣେ କି 2ଜଣ ନୁହେଁ 70 ଜଣ ପ୍ରସୂତି ଏପରି ଦୂରବସ୍ଥା ଭୋଗୁଛନ୍ତି । ମେଡିକାଲ ବେଡ ଅଭାବ ସାଙ୍ଗକୁ ଅସହ୍ୟ ଗରମରେ ଆଉଟୁପାଉଟୁ ହେଉଛନ୍ତି ପ୍ରସୂତିଙ୍କ ସହ ନବଜାତ ଶିଶୁ । ଏ ହୃଦୟବିଦାରକ ଦୃଶ୍ୟ ହେଉଛି ଖୋଦ ବୌଦ୍ଧ ଜିଲ୍ଲା ମୁଖ୍ୟ ଡାକ୍ତରଖାନାର ।
ଭିଡିଓ ସୌଜନ୍ୟ: ପ୍ରତିନିଧି ବୌଦ୍ଧ
ଜିଲ୍ଲା ମୁଖ୍ୟ ଡାକ୍ତରଖାନାର ଏ ଦୂରାବସ୍ଥା କେହି ଜଣେ ଆଖିରେ ନଦେଖିଲେ ବିଶ୍ବାସ କରିପାରିବ ନାହିଁ । ଏନେଇ ମେଡିକାଲର ସମସ୍ତଙ୍କ ହାତରେ ବିଞ୍ଚଣା ଏକ ସାଧାରଣ କଥା ହୋଇଛି । ଏପଟେ ଡାକ୍ତରଖାନାରେ ପ୍ରସୂତିଙ୍କ ପାଇଁ ସମୁଦାୟ ୧୬ଟି ବେଡ ଥିବା ବେଳେ ରବିବାର ସୁଦ୍ଧା 70 ଜଣ ପ୍ରସୂତି ଆଡମିଟ ହୋଇ ନବଜାତ ଶିଶୁଙ୍କ ସହ ବାରଣ୍ଡାରେ ଚିକିତ୍ସିତ ହେଉଥିବା ଦୃଶ୍ୟ ଦେଖିବାକୁ ମିଳିଛି । ମେଡିକାଲରେ ପଙ୍ଖା ଲାଗିଛି, ହେଲେ କାମ କରୁନାହିଁ । ଚବିଶ ଘଣ୍ଟିଆ ବିଦ୍ୟୁତ ସେବା ଛାଡନ୍ତୁ, ଜେନେରେଟର ମଧ୍ୟ ଠିକରେ କାମ କରୁ ନଥିବାରୁ ପଙ୍ଖା ଯେଉଁ କେତୋଟି କାମ କରୁଛି ତାହାବି ଅଚଳ ସମାନ ।