ଭଦ୍ରକ: ପ୍ରଥମ ଥର ପାଇଁ ଭଦ୍ରକ ଲୋକସଭା ନିର୍ବାଚନରେ ଦେଖିବାକୁ ମିଳିଛି ଏକ ଯୁବ ଚେହେରା । ପୂର୍ବରୁ ଅଭିଜ୍ଞତା ରଖିଥିବା ଅନେକ ନେତାଙ୍କୁ ପଛରେ ପକାଇ ଦଳ ଅଧିନାୟକଙ୍କ ବିଶ୍ବାସ ଜିତିଛନ୍ତି ଏହି ଯୁବ ନେତା । ଭଦ୍ରକ ଲୋକସଭା ଆସନ ପାଇଁ ବିଜେପି ପକ୍ଷରୁ ମିଳିଛି ତାଙ୍କୁ ଟିକେଟ୍ । ଆମେ କହୁଛୁ 2 ଥର ବିଧାୟକ, 8 ଥର ସାଂସଦ ଏବଂ ଥରେ କେନ୍ଦ୍ରମନ୍ତ୍ରୀ ଥିବା ସାଂସଦ ଅର୍ଜୁନ ଚରଣ ସେଠୀଙ୍କ ପୁଅ ଅଭିମନ୍ୟୁ ସେଠୀଙ୍କ କଥା । ବିଜେପି ପ୍ରାର୍ଥୀ ଭାବେ ଅଭିମନ୍ୟୁ ଆଜି ନିଜ ନାମାଙ୍କନ ପତ୍ର ଦାଖଲ କରିଛନ୍ତି।
ଭିଡିଓ ସୌଜନ୍ୟ: ସମ୍ବାଦଦାତା, ଭଦ୍ରକ
ବିଜେପିର ବହୁ କର୍ମୀଙ୍କ ଗହଣରେ ଅଭିମନ୍ୟୁ ଭଦ୍ରକ ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ନାମାଙ୍କନ ପତ୍ର ଦାଖଲ କରିଛନ୍ତି। ତେବେ ଦଳ ତାଙ୍କ ଉପରେ ବିଶ୍ବାସ କରି ଟିକେଟ ଦେଇଥିବାରୁ ଦଳର ନେତୃତ୍ଵଙ୍କୁ ଧନ୍ୟବାଦ ଜଣାଇଛନ୍ତି ସେ । ଏହା ସହିତ ଭଦ୍ରକର ଅନେକ ଅଧା କାର୍ଯ୍ୟକୁ ପୂରଣ କରିବେ ବୋଲି କହିଛନ୍ତି । ଚଳିତ ନିର୍ବାଚନରେ ନିଶ୍ଚିତ ବିଜୟ ହାସଲ କରିବା ନେଇ ଆଶାବାଦୀ ଅଛନ୍ତି ସେ ।