ଭଦ୍ରକ: ଜିଲ୍ଲାର ତଳିଆ ଅଞ୍ଚଳରେ ବର୍ଷା ଓ ବନ୍ୟାଜଳ ଗାଁ ଭିତରୁ କମି ନାହିଁ । ବନ୍ୟାଯୋଗୁଁ ଲୋକଙ୍କ ଦୁର୍ଦ୍ଦଶା ବଢୁଛି । ସେପଟେ ପୁଣି ଥରେ ବୈତରଣୀ ନଦୀରେ ଦ୍ବିତୀୟ ବନ୍ୟା ଆସିଛି । ଏହି ନଦୀର ଉପରମୁଣ୍ଡରେ ପ୍ରବଳ ବର୍ଷା ଯୋଗୁ ବନ୍ୟା ଆସିଛି । ଆଖୁଆପଦା ଠାରେ ଏହି ନଦୀର ବିପଦ ସଙ୍କେତ 17.83 ମିଟର ଥିଲା ବେଳେ ଏହା 18.45 ଉପରେ ପ୍ରବାହିତ ହେଉଛି । ଫଳରେ ଏହି ବନ୍ୟାଜଳ ତଳିଆ ଅଞ୍ଚଳ ଲୋକଙ୍କ ଦୁଃଖକୁ ଦ୍ବିଗୁଣିତ କରିଛି ।
ବୈତରଣୀରେ ବନ୍ୟା ପରିସ୍ଥିତି
ଗତ ବନ୍ୟାରେ ଭଦ୍ରକ ଜିଲ୍ଲାର ଭଣ୍ଡାରିପୋଖରୀ, ଧାମନଗର, ତିହିଡି ଏବଂ ଚାନ୍ଦବାଲି ବ୍ଲକର 32 ଗୋଟି ପଞ୍ଚାୟତ ପ୍ରଭାବିତ ହୋଇଥିଲା । ପ୍ରାୟ 20 ହଜାର ହେକ୍ଟରରୁ ଅଧିକ ଚାଷ ଜମିରେ ବନ୍ୟା ପାଣି ମାଡି ଯାଇଥିଲା । ଶାଳନ୍ଦୀ ଏବଂ ବୈତରଣୀ ନଦୀରେ ଏକା ସାଙ୍ଗରେ ବନ୍ୟା ଆସିବା ଯୋଗୁଁ ଏବେ ବି ତିହିଡି ବ୍ଲକ ତଳିଆ ଅଞ୍ଚଳ ଗାଁ ଭିତରୁ ପାଣି ଛାଡି ନାହିଁ । ସେହିପରି ଧାମନଗର, ତିହିଡି ଏବଂ ଚାନ୍ଦବାଲି ବ୍ଲକର ତଳିଆ ଅଞ୍ଚଳରେ ଚାଷ ଜମିରେ ବନ୍ୟା ପାଣି ଅଛି ।